U kúuchil Academia de Artes Escénicas ti’ u noj lu’umil Españae’ tu k’ubaj jump’éel u medaaysil oro ti’ u kúuchil Palacio de Bellas Artes yaan tu noj kaajil Ciudad de México, líik’sa’an yóok’ol u yúuchben kúuchil Teatro Nacional, ts’o’oke’ tu jo’oloj 90 ja’abo’obe’ láayli’ u beeta’al jejeláas u ye’esajilo’ob balts’am, óok’ot, ballet, ópera, ichil uláak’o’ob.
Le jk’u’ubo’, jump’éel ti’ le ukp’éel medaayáas yaan u ts’a’abal tumen u academiail España le 4 ti’ noviembre ku taala’, tu noj kaajil Valladolid, tu súutukil u chíimpolta’al u noj ba’alo’ob mola’ayo’ob, beyxan ajpatjo’ol máako’ob yéetel aj-its’ato’ob yaan ba’al u yil yéetel artes eseenikáas, jts’a’ab k’ajóoltbil le lunes máanika’.
En español: El Palacio de Bellas Artes de México, premiado por la Academia de Artes Escénicas española
Je’el bix u kúuchil Palacio de Bellas Artes de Ciudad de Méxicoe’, yana uláak’ kúuchilo’ob kun k’amik u chíimpolalil je’el bix Festival Iberoamericano del Siglo de Oro, tu baantail Madrid yéetel u kúuchilo’ob balts’am Romea yéetel Calderón, tumen ts’o’om maanal siglo y medio kuxlako’ob tu noj kaajilo’ob Barcelona yéetel Valladolid.
Uláak’ jump’éel kúuchil kun k’amik chíimpolale’, Teatro Soho táakmuk’ta’an tumen Antonio Banderas; je’el bix xan Teatro Palacio Valdés de Avilés; yéetel u múuch’il La Zaranda, de Jerez de la Frontera, láayli’ ti’ u noj lu’umil España.
Xak'alutskíinsa'an tumen: Sasil Sánchez Chan
