Yéetel u tuukulil u meyaj ti’al kaaje’, Virginia López de la Cruz, Venancio Canul May, Luis Roberto Orejel García yéetel Félix Guillermo May May béeychaj u ts’o’oksiko’ob kaambal unaj u yantal ti’al u béeytal u yokolo’ob tu múuch’ meyajil Cuerpo de Bomberos ti’ u kaajil Tulum.
Le kantúul máako’oba’ tu ts’o’oksajo’ob kaambal xáanchaj ukp’éel k’iino’ob, tu’ux yanchaj u máansiko’ob jejeláas pruebáas, beey jts’a’ab k’ajóoltbil tumen Benjamín Heredia Monforte, máax jo’olbesik Dirección de Bomberos de Tulum. Kaambale’ ts’o’ok le domingo 27 ti’ octubre máaniko’, tu’ux e’sa’ab ba’alo’ob je’el bix u teoríail k’áak’, u nu’ukulil u kaláantikubáaj máak, u kaxta’al u tu’upul k’áak’ ti’ naj wa ti’ kis buuts’, u kaxta’al yéetel u kaláanta’al wíinik ich k’áax yéetel u kaxta’al yéetel u to’okol máak tu’ux t’aabal k’áak’.
En español: Tras demandante entrenamiento, cuatro personas ingresan al Cuerpo de Bomberos de Tulum
“Tuláakal ba’ax beeta’ab ti’al u yéeyalo’obe’ yanchaj ba’al u yil yéetel kóondosyon fisikáa beyxan wa tu kanaj u máak’anto’ob tu beel teeknikáas e’esa’ab ti’ob. Ti’ túun tak ilaj wa no’okantako’ob ti’al le je’ela’”, a’alab tumen Heredia Monforte.
Virginia López de la Cruze’ 28 u ja’abil. Juntúul ti’ le ka’atúul xch’úupalal túumben ookik. Luis Roberto Orejel Garcíae’ 29 u ja’abil. Leti’e’ ti’ síij tu kaajil Toluca, Estado de México, ba’ale’ k’uch Tulum walkil ka’ap’éel winalo’ob tu jo’oloj u meyajt u jkanan kaajil yéetel jtup k’áak’ tu kaajal.
Xak'alutskíinsa'an tumen: Sasil Sánchez Chan
