Seten k’a’amkach cháak táan u k’áaxal tu chik’inil Españae’ ts’o’ok u beetik búulul kaaj jayp’éel k’iino’ob paachil, ts’o’oke’ tu beeto’ob u kíimil kex 217 máako’ob, u ya’abile’ naats’ Valencia, le beetike’ yanchaj u xo’ot’ol u meyaj tsíimik k’áak’ naats’ te’el kaajo’.
Máax beetik u ministroil Transportes ti’ u lu’umil España, Óscar Puente, tu k’a’aytaj u xo’ot’ol u meyaj tsíimin k’áak’ naats tu xamanchik’inil Cataluña, tu’ux kaja’an kex 8 miyoonesil máako’obe’, tumen beey úuchik u k’áata’al tumen u jo’olpóopilo’ob protección civil.
En español: Fuertes lluvias paralizan trenes en Barcelona mientras aún se buscan víctimas por DANA en Valencia
Séelularo’ob tu kaajil Barcelonae’ tu chíikbeso’ob alerta yóok’olal “k’a’amkach cháak ma’ táan u xóot’ol” tu noojol jáalpachil kaaj. Te’el k’uben t’aano’ k’áata’ab ti’ kaaj ka yanak u tse’elel je’el ba’axak níixil wa tikil beel ja’.
Beyxan Puertoe’ tu k’a’aytaj cháake’ tu beetaj u k’e’exel u beelil u máan 15 u p’éel péepen k’áak’.
Yanchaj u je’elsal xook Tarragona, noj kaaj tu noojolil Cataluña kex chúumuk bej ichil Barcelona yéetel Valencia, úuchik u k’a’aytal alerta roja yóok’olal le cháako’.
Ka’alikil tu kaajil Valenciae’, láayli’ u máan kaxtbil u wíinkilal máako’ob ich le najo’obo’, yéetel ya’abach kis buuts’o’ob xe’exek’ta’ab te’el bejo’obo’.
U ministro españolil Interior, Fernando Grande-Marlaska, tu ya’alaj jo’olpóopo’obe’ ma’ táan u béeytal u ya’aliko’ob jach jaytúul máak saatal.
Xak'alutskíinsa'an tumen: Sasil Sánchez Chan
