Tu bejilo’ob u ka’ap’éel asab k’a’anan noj kaajil Pakistán, Lahoree’, chíika’an u piimil ba’ax ku buuts’áankil ku beetik u jela’anpajal u yich yéetel u beel u kaal máak. Te’el najo’obo’, ma’ ya’ab máak ma’ táan u biinsik u paalal te’el najilo’ob xooko’, tumen jach píitmáanja’an u k’aasil le iik’ te’el ja’aba’.
Rafia Iqbal, juntúul xka’ansaj 38 u ja’abile’, k’a’abéet u ts’áak xook ti’ Internet tak tu k’iinil 17 ti’ noviembre, ts’o’oke’ chi’ichnak yóok’olal u toj óolal u xoknáalo’ob, ba’ale’ beyxan u ti’al u paalal, Sameen, 11 u ja’abil, yéetel Haider, 5.
En español: Unicef advierte del impacto de la contaminación tóxica sobre millones de niños en Pakistán
"Paalale’ laj oráa ku sasak’kaal, ku yaalankil u síin u ni’ob, ku chokwilo’ob. Te’el najilo’ob xooko’, u ya’abil paalale’ k’oja’an”, tu ya’alaj ti’ AFP.
Ts’o’ok maanal jump’éel semana píitmáanak u jach k’aasil iik’, óoli’ je’ex mix juntéen yáax úuchuko’: Lahore, tu’ux kaja’an 14 miyonesil máak, óoli’ sáansamal ts’o’ok u máan yóok’ol mil, ts’o’oke’ ka’ache’ kéen k’uchuk 300e’ leti’e’ kéen a’alak “sajbe’entsil” iik’ ti’al wíinik.
Multan, uláak’ jump’éel u noj kaajil Punyab, tu xuul kaajil yéetel India, u iindiseil tu píitmáansaj 2 mil, jump’éel ba’al mixjuntéen yáax ila’ak.
U mola’ayil Organización Mundial de la Salud (OMS) ku ya’alik sajbe’entsil u xáantal wíinik ti’ buuts’ je’ex bix le je’elo’, tumen je’el u beetik k’aak’as ba’al tu ts’o’omel u pool máak, u k’oja’antal u puksi’ik’al wíinik, u jelpajal u ch’a’ak u yiik’ máak, ba’ale’ u ya’abile’ ti’ paalal.
Jump’éel u purificadoril iik’e’ chéen ti’al ayik’al máak: le maas ma’ jach ko’ojtake’ ku tojoltik kex 90 dolares, u náajal juntúul funcionario te’elo’, ba’ale’ maanal u 40 por siientoil kaaj te’elo’, kuxa’an ich óotsilil.
Xak'alutskíinsa'an tumen: Sasil Sánchez Chan
