Túumben xaak’alo’obe’ ku ya’alik tu yáam Miranda, uj ti’al u lu’umil Uranoe’, yaan k’áak’náab. Le ba’ax ojéelta’aba’ ku p’atik paachil jejeláas ba’alo’ob ku tukulta’al yóok’olal u k’ajla’ayil beyxan yóok’olal ba’ax tukulta’an yaan te’el ujo’. Ts’o’oke’ ku p’áatal ichil le junp’íit yóok’ol kaabo’ob ichil sistema solar no’ojan yanik ti’al u yantal kuxtal.
Jak’be’en ba’al u yojéelta’al yaan ja’ ichil jump’éel chan eek’ je’el bix Miranda, tu ya’alaj u ajxak’al xookil planetario ti’ u kúuchil Laboratorio de Física Aplicada Johns Hopkins tu noj lu’umil Estados Unidos yéetel máax táakpaj tu xaak’al jts’a’ab k’ajóoltbil tu pikil ju’unil The Planetary Science Journal Tom Nordheim.
En español: La luna Miranda de Urano podría tener un enorme océano bajo su superficie: Esto dice nuevo estudio
U kóochil Mirandae’ kex 233 kms, yéetel tu yóok’kabile’ chíika’an máax k’iin. Béeychaj u jóok’sa’al u yoochel ka’aj xik’náalnaj jump’éel Voyager 2 tu ja’abil 1986, chéen ba’axe’ te’el k’inako’obe’ chéen béeychaj u xak’alta’al u ti’its noojolil.
Ka’aj xak’alta’ab u topografíail uj tu Laboratorioil Física Aplicada tu noj najil xook Universidad Johns Hopkinse’, ka’aj Ila’abe’ kex ichil 500 yéetel 100 miyoonesil ja’abo’ob paachile’, tu yáam u yáam yáal yeeloe’, kex 30 kms u piimile’, tu taamil Mirandae’ yaan jump’éel nojoch k’áak’náab, ts’o’oke’ wa tumen ku ch’a’anukta’al beyka’aj u kóochil uje’, míin k’áak’náabe’ ku chupik kex u chúumuk u wóolisil.
Xak'alutskíinsa'an tumen: Sasil Sánchez Chan
