"Jump’íit wa mixba’al ts’íibta’an yóok’olal meyaj beeta’ab tumen jaytúul ko’olelo’ob ti’al u jats’utstal u yila’al yéetel ti’al ka yanak máax kaxtik u nu’ukil miatsil tu noj lu’umil México, úuchik u yantal máax páaktik u beel, u péektsiltik yéetel u chíikbesik ba’ax le ku beeta’alo’”, ts’íibta’ab tumen Rosa Beltrán tu yáax ts’íibil u áanalte’il Agentas culturales del siglo XX: Desafíos de una gestión.
“Ma’ xan yáax yanak máax ts’íibtik wa ba’ax yóok’olal le k’a’anan ko’olelo’oba’ tu’ux ka’aj chíikpajak tu chuuka’anil u meyajo’ob”, tu jets’aj xts’íib yéetel máax jo’olbesik u meyajil Difusión Cultural ti’ u noj najil xook Universidad Nacional Autónoma de México (UNAM).
Tu ya’alaj: “Meyajo’ob tu’ux ku xak’alta’al ba’ax u beetmaj ko’olel tu ichil u yits’atil Méxicoe’ chéen ku ka’aj máan yóok’ol jaytúul máako’ob k’ajóolta’an, yéetel jump’éelili’ bix u paakata’alo’ob. K’aaba’obe’ leti’e’ mantats’ suuk u yu’ubalo’ob. Mina’an u k’aaba’ ya’abach uláak’o’ob, ts’o’oke’ lelo’ ku beetik u tukulta’ale’ ma’ ya’abak ko’olel beetik wa ba’ax yóok’olal miatsil, wa ma’ jach k’a’anano’ob ichil u t’aan máaxo’ob a’alik wa ba’ax tumen u ya’abile’ xiib a’almajil”.
Beey túuno’, tu áanalte’il Agentas culturales del siglo XX, jóok’sa’ab tumen UNAMe’, táakpaj beey editoras Graciela de la Torre, máax jo’olbesik Cátedra Internacional Inés Amor en Gestión Cultural, yéetel x-xaak’al Ana Garduño, ku ye’esik u maapail k’a’anan ko’olelo’ob yaan noj ba’alob u beetmo’ob ichil u meyajil its’at tu noj lu’umil México.
Te’elo’ táakbesa’an u k’aaba’ Carolina yéetel Inés Amor, máaxo’ob káajs Galería de Arte Mexicano; x-galerista María Asúnsolo; xch’a’a oochel Lola Álvarez Bravo, máax p’aatal tu táan Galería de Arte Contemporáneo; “incansables” Ana María yéetel Teresa Pecanins, máaxo’ob jo’olbesik kúuchil k’aaba’inta’an je’ex leti’obo’, yéetel u x-críticasil its’at Raquel Tibol, Ida Rodríguez Prampolini yéetel Teresa del Conde.
Beyxan ku ch’a’achibta’al Lydia Sada, Margarita Garza Sada de Fernández, Geles Cabrera, Ángeles Espinosa Yglesias Rugarcia, Dolores Olmedo, Carmen Barreda, Helen Escobedo, Sylvia Pandolfi, Graciela de la Torre, Margarita Nelken, Elisa Vargaslugo, Beatriz Ramírez de la Fuente yéetel Juana Gutiérrez Haces
Xak'alutskíinsa'an tumen: Sasil Sánchez Chan
