Abu Obeida, máax beetik u k’a’aytajilo’ob Brigadas al Qasam, múuch’o’ob ku ba’atelo’ob tu favor Hamás, tu ya’alaj mokt’aan jets’a’ab ti’al u xu’ulsa’al ba’ateltáambal táan Franja de Gaza, káaj u chíimpolta’al le domingo máanika’ tu jo’oloj maanal jo’olajunp’éel winalo’ob ba’atele’, je’el ka’ach u béeytal u je’ets’el walkil jump’éel ja’ab pachile’ chéen wa ka óota’ak tumen u yáax ministroil isreaeliil, Benjamín Netanyahu.
“Mokt’aan béeychaj te’el k’iino’oba’, ts’o’ok ka’ach u béeytal walkil jump’éel ja’ab wa tumen ka je’ets’ek ba’ax u k’áat Netanyahu”, tu ya’alaj Obeida ti’ jump’éel k’a’aytajil cha’an beeta’ab ti’al u ya’alik ba’ax táakbesa’ab ich “Operación Inundación de Al Aqsa”
A’alabe’ islamistail múuch’e’ u k’áat u chíimpolt ba’ax jets’a’an ichil mokt’aan, ba’ale’ le beyka’aj kun xáantal yéetel u beeta’al ba’al je’el bix a’alabiko’ yaan u yila’al “bix kun úuchul yéetel u jeelo’obo’”.
Tukulta’an ka’ache’ u jáawsa’al ba’atele’ láas 6.30 GMT kun úuchul, ba’ale’ Netanyahue’ tu xaankunsaj tumen tu ya’alaj Hamáse’ ma’ bin u k’ub le óoxp’éel k’aaba’ob máak ken u yáax jáalk’a’abtej, je’el bix jets’a’abiko’, ts’o’oke’ tumen beey k’a’ayta’ab tumen Catar le jueves máaniko’, ba’ale’ Israele’ ma’ tu ka’a a’alaj tu píik’sáastalil le sábado máanika’.
U k’aaba’ óoxtúul ko’olel ts’o’ok u cha’abal walkila’: Emily Damari, Doron Steinbrecher yéetel Romi Gonen. Leti’obe’ jcha’abo’ob ti’al u béeytal xan u su’utul 90 u túul palestinoil k’ala’ano’ob xan, u ya’abile’ ko’olel yéetel paalal.
Xak'alutskíinsa'an tumen: Sasil Sánchez Chan
