Ti’al le miércolesa’ ku tukulta’ale’ yaan u ke’eltal tak -15 grados Celsius yéetel u síisile’ yaan u yu’uba’al tu wiitsilo’ob Durango; yaan xan u yu’uba’al ichil -15 tak -10 grados yéetel u síisil tu lu’umil Baja California yéetel Chihuahua; ichil -10 tak -5 grados yéetel u síisil tu wiitsilo’ob Sonora, Coahuila, Nuevo León, Tamaulipas yéetel Zacatecas.
U kúuchil Servicio Meteorológico Nacional (SMN) ku tukultike’ yaan xan u yu’uba’al ke’el ichil -5 tak 0 grados yéetel u síisil tu baantail San Luis Potosí, Aguascalientes, Jalisco, Michoacán, Guanajuato, Querétaro, Hidalgo, Estado de México, Tlaxcala, Puebla, Veracruz yéetel Oaxaca, beyxan ichil 0 tak 5 grados tu ka’anal baantailo’ob Baja California Sur, Sinaloa (sierra), Nayarit (sierra), Ciudad de México, Morelos yéetel Chiapas.
En español: Prevalecen bajas temperaturas: Pronostican hasta -15 grados en estos estados de México
Mola’aye’ tu k’áataj ti’ kaaj ka u tep’ubáaj tu beel, beyxan ka u yuk’ nonoj ja’, ma’ u jach jóok’ol máak ti’ síis wa chokoj u yóol, beyxan u kaláanta’al máaxo’ob k’oja’ano’ob, paalal yéetel nojoch máako’ob, je’el bix xan u ch’enxikinta’al ba’ax ku ya’alal tumen Sector Salud yéetel Protección Civil.
Táan u yila’ale’ yaan u yokol ke’el ichil 60 tak 80 kms yóok’ol jump’éel hora (km/h) yéetel u chichil u jaats’e’ ichil 90 tak 110 km/h kun u’uybilistmo yéetel tu golfoil Tehuantepec; ichil 50 tak 70 km/h yéetel u chichil u jaats’e’ ichil 80 tak 100 km/h, tu ja’atsikb k’iinil Veracruz; ichil 30 tak 50 km/h yéetel u chichil u jaats’e’ 60 tak 80 km/h tu lu’umil Tamaulipas, Tabasco, Campeche, Yucatán yéetel Quintana Roo.
U chichil u jaats’ iik’e’ je’el u lúubsik che’ob yéetel uláak’ ba’alo’ob, le beetik ku k’áata’al ti’ kaaje’ ka u kaláantubáaj yéetel ka u yu’ub ba’ax ku ya’alik SMN, ti’ u mola’ayil Comisión Nacional del Agua (Conagua) yéetel u beetik ba’ax ku ya’alal tumen Protección Civil.
Xak'alutskíinsa'an tumen: Sasil Sánchez Chan
