Jump’éel jats’uts cha’an yéetel sáasilo’obe’ tu julo’ob áak’ab ka’an le miércoles máaniko’ tu kaajil Xiamen, kaaj yaan jáal ja’, yéetel tu kaajil Kinmen, úuchik u k’iimbesa’al Túumben chinoil Ja’ab.
Ka tu chukaj las 8 áak’abe’, paklan úuchik u wa’ak’al kex 50 mil sáasilo’ob tu jáal ja’il Xiamen, tu kaajil Fujian, yéetel Kinmen.
Sáasilo’obe’ xáanchaj kex 30 minutos, ts’o’oke’ yanchaj jejeláasil u temasil tu ka’ap’éel kaajil, tu’ux chíikbesa’ab ba’alo’ob e’esik Fiesta de la Primavera, ba’ale’ beyxan ba’ax nupik tu ka’ap’éel kaajilo’ob.
Hong Tzu-i, máax yanchaj tu kaajil Chiayi, Taiwan ba’ale’ kaja’an Xiamen walkila’ k’uch antes yéetel u chan paalil ti’al u kaxtikk tu’ux u cha’antik tu beel le sáasilo’obo’
“Jach ki’imak in wóol u béeytal in biinsik in chan paalil cha’an. Sáasilo’ob tu ka’ tse’elil kaajo’obe’ jach jats’uts u yila’al”, tu ya’alaj.
“Talam u ya’alal yéetel t’aano’ob ba’ax ku yu’ubik máak cha’an beya’: Kexi’ ka beeta’ak tu paachil k’iin ja’ab man ja’ab”, tu ya’alaj juntúul u kajnáalil Taiwan, máax cha’an sáasilo’ob jt’a’ab Kinmen.
Cha’an ku beeta’al ti’al u k’a’amal Túumben chinoil ja’abe’ káaj tu ja’abil 1987, ts’o’oke’ tu mu’uk’ankúunsaj bix nuupulil continental kaajo’ob yéetel Taiwán.
Xak'alutskíinsa'an tumen: Sasil Sánchez Chan
