Tu jo’oloj ts’a’abak k’ajóoltbil ChatGPT tu ts’o’okbal u ja’abil 2022e’, le ba’ax k’aaba’inta’an beey inteligencia artificial (IA) generativa séeb líik’ u xiik’ ichil nukuch estadunidenseil mola’ayo’ob, ba’ale’ walkila’ táan u bin u yantal uláak’ europeail yéetel chinail mola’ayo’ob yéetel le ku ketikubáaj.
Ikil táan u náats’al u múuch’tambalil IA tu noj lu’umil París (10 yéetel 11 ti’ febrero), ku chíikpajal le je’elo’oba’:
OpenAI, le tu láaj káajsako’. Estadunidenseil mola’ay jach k’ajóolta’ab tumen tu chúunsaj ChatGPT, chatbot (robot ku tsikbal).
Mola’ay béeykuns u k’ujsik IA ti’ tuláakal máake’ ts’o’ok u jach ts’áak taak’in ti’al u béeytal.
OpenAI ts’o’ok u k’amik tak walkila’, kex 20 mil millonesil dólares ti’al u meyajta’al, u ya’abile’ ts’a’aban tumen nojoch mola’ay Microsoft, u maas nojochil accionista.
Ichil ba’ax jts’a’ab k’ajóoltbil tumen Wall Street Journal, ti’al u ts’o’okbal eneroe’, start-upe’ táanili’ u tsikbaltik bix je’el u béeytal u much’ik uláak’ kex 40 millonesil.
Sam Altman, máax múul patjo’olt OpenAI, leti’ máax jo’olbesik mola’ay kex jóok’sa’abij ba’ale’ ma’ xáanchaji’.
OpenAI jump’éel firma ma’ jets’a’an ti’al náajali’, ba’ale’ walkila’ táan u yila’al wa je’el u k’éexele’, ti’al ka béeyak u náajaltik taak’in.
Anthropic, estadunidenseil mola’ay yéetel le ku ketikubáaje’, káajsa’ab tu ja’abil 2021 tumen Dario y Daniela Amodei, ka’atúul máax táaka’an ka’ah OpenAI, ts’o’oke’ ku ya’alike’ u modeloil Claude, maas jeets’el bix u kaláantik ba’al keetel yéetel le uláak’o’obo’.
Kex tumen mola’ay ma’ béeyak u kóolik taak’in je’el bix OpenAI, ku kaxtik xan ka yanak k’a’anan máak óotik meyaj tecnológico ba’al yéetel.
Ti’al u ts’o’okbal noviembree’, Amazone’ tu ts’áaj 4 mil millonesil dólares, ti’al beyo’ u chukik tuláakal taak’in ts’a’aban u ti’ale’ kex 8 mil millones dólares.
Xak'alutskíinsa'an tumen: Sasil Sánchez Chan
