Tu píik’sáastalil le lunes máanika’, jump’éel bus táan ka’ach u biinsik máake’, tselk’aj tu taamil tu’ux k’óom taam. Le beetike’, jkíim 55 máako’ob, ichilo’obe’ yaan paalal, beey úuchik u ya’alal tumen jtup k’áak’o’ob.
Ministerio Público tu jets’aje’ jach te’el tu’ux úuch le loobilajo’, xoka’ab 53 u p’éel wíinkilalo’ob. U kúuchil ts’akyaj San Juan de Diose’, tu ya’alaj ka’atúul máak k’ujsa’ab ka’ache’ jkíim xan.
Jtup k’áako’obe’ tu ya’alajo’ob yanchaj máak to’ok ichil u xiixel le buuso’. Jala’acho’obe’ tu je’ajob jump’éel kúuchil ti’al u líik’sa’al kimeno’ob chéen tu súutukil táan u yúuchul le ba’alo’, ti’ jump’éel chan kajtalil naats’ te’el tu’ux úuch le loobilajo’.
En español: Un mexicano, entre los 55 fallecidos en accidente vehicular en Guatemala: Embajada
Jtup k’áako’obe’ tu ya’alo’ob buuse’ walk’aj ka’alikil táan ka’ach u máan ti’ jump’éel puente, ts’o’oke’ kex chúumuk ti’ leti’e’ búul tu boox ja’il jump’éel río, ba’ale’ tu jo’oloj a’alab tumen jo’olpóope’, buse’ jlúub úuchik u aktáantikubáaj yéetel uláak’ kisbuuts’o’ob. Te’el kúuchilo’, jtup k’áak’ Carlos Hernándeze’ tu ya’alaj ichile’ na’akan xoknáalo’ob yéetel máako’ob ku bino’ob meyaj te’el noj kaajo’.
Tu cámarasil le kaajo’ ku béeytal u yila’al bix u chich máan bus tak kéen u jéenant ka’ap’éel kis buuts’, ku ts’o’okole’, ma’ chíika’an te’el cámaraso’, ku lúubul tu’ux k’óom taam.
U jk’a’aytajil Bomberos Voluntarios, Óscar Sánchez, tu ya’alaj buse’ luk’ tu kaajil El Progreso, tu lak’inil noj lu’um, ti’al u bin ka’ach tu noj kaajil lu’um. “Kex 35 metros u ka’analil tu’ux lúubij”, tu ya’alaj.
Instituto Nacional de Ciencias Forenses ts’o’ok u jets’ik 23 ti’ le máako’ob kíimij. Beyxan tu ya’alaje’ u wíinkilal piloto yéetel máax áantik ka’achij yaan u túuxta’al morgue ti’al u yila’al jach bix yaniko’ob ka’aj úuch le loobilajo’.
