Ichil tuláakal registros beeta’ane’, ila’ab tu ja’abil 2024e’, Méxicoil kúuchkabalo’obe’ p’aaxnaj tu jach táaj ya’abil ti’ banca privada, beey chíikpaj ti’ ts’ook datos jóok’sa’ab tumen Banco de México (BdeM).
Ti’al u ts’o’obal le ja’ab máaniko’, le beyka’aj taak’in muuch’ul ti’ ba’ax k’ajóolta’an beey cartera vencida yóok’olal p’aax ku ts’a’abal tumen privada mola’ayo’ob ts’áak p’aaxe’, u ya’abile’ táanxel lu’umilo’obe’, tu ts’áaj ti’ kúuchkabalo’ob tu noj lu’umil Méxicoe’, kex 87 mil 37 millonesil pesos, le je’ela’ kex u 5.8 por ciento maanal ti’ le 79 mil 93 millonesil xoka’ab yanchaj tu ja’abil 2023.
Le taak’in je’elo’, leti’e’ maas jach ka’anal ts’o’ok u yantal te’el banco centralo’, desde ka’aj káaj u beeta’al u registroil tu ja’abil 2003, tu’ux táaka’an xan p’aax ku ts’a’abal ti’al consumo beyxan hipotecarios tumen tak walkila’ ts’o’ok kex 90 k’iino’ob ma’ tu k’amiko’ob bo’ol tumen máaxo’ob ti’ jts’a’ab u majáantej.
Créditos ti’al consumoe’ leti’e’ ku ts’a’abal ti’ tarjetas de crédito, p’aax ku luk’sa’al ti’ máak ti’ u náajal meyaj, le ku ts’a’abal ti’ máak ti’a u ma’anal kis buuts’, ichil uláak’o’ob; ka’alikil hipotecariose’ leti’e’ yaan ba’al u yil yéetel jump’éel naj.
P’aax p’aatal ich cartera vigente ch’a’aban tumen kúuchkabalo’obe’ -le ku bo’otal tu k’iinile’- naakal 2 billones 866 mil 769 millonesil pesos. Ts’o’oke’ tak le je’elo’ leti’e’ u mas ya’abil ts’o’ok u yantal ichil registros.
U ajxak’al máakilo’ob Intercame’ tu ya’alajo’ob 2024e’ jach ma’alob ja’ab ti’al banca tumen u tasail referenciae’, leti’e’ ba’ax ts’áak beyka’aj tojol ku ts’a’aabal ti’ mola’ayo’ob yéetel kúuchkabalo’obe’, láayli’ ka’anal yanchaji.
Xak'alutskíinsa'an tumen: Sasil Sánchez Chan
