Máako’ob jach kaambanaja’ano’ob yóok’olal k’áak’nabe’ ts’o’ok u p’atiko’ob ba’ax táan u beeta’al ka’ach ti’al u kaláanta’al u kuxtal maanal 150 u túul falsas orcas t’i’ilo’ob ti’ jump’éel jáal ja’ tu kaajil Tasmania, ti’ australiail lu’um, beey a’alabik tumen ajmeyaj máako’ob le miércoles máanika’.
Veterinarios yéetel uláak’ máaxo’ob táan ka’ach u meyajo’obi’, bino’ob te’el kúuchil naats’ yaan tu ríoil Arthur, tu xamanlak’inil Tasmaniae’, tu’ux kaxta’ab 157 u túul ballenas, tu ya’alaj Departamento de Recursos Naturales y Medio Ambiente.
En español: Más de 150 falsas orcas quedan varadas en una playa de Tasmania; expertos prevén sacrificarlas
Táan u yila’ale’, yaan u xáantal jayp’éel k’iino’ob bix yanik condiciones climáticas yéetel k’áak’nab, ts’o’oke’ le beetik ma’ béeychaj u yáantalo’ob le miércoles máanika’, tu ya’alaj u controladorail incidentes, Shelley Graham.
”Bino’on te’el jáal ja’o’, ts’o’oke’ tak ts’áajekbáaj k-ka’ oks ich ja’ ka’atún ballenas, ba’ale’ ma’ béeychajij tumen yóok’olal bix yanik k’áak’nabe’, ba’alche’obe’ ma’ táan u béeytal u biino’ob maas taam ti’ le tu’ux yano’obo’.
Yaan u ka’ k’áalalo’obi’”, tu ya’alaj Graham ti’ k’a’aytajil ts’íib, Jbiólogo marino, Kris Carlyon tu ya’alaje’ ba’alche’ob láayli’ kuxa’ano’obe’ yaan u yantal u kíinsa’alo’ob. “Wa maas ku xáantal chéen ti’ p’aatal ba’alche’obe’, ku maas muk’yajo’ob.
Ma’ jóok’ok tu beey uláakal ba’ax ts’o’ok kts’áakikbáaj kbeetej”, tu ya’alaj Carlyon. Mola’aye’ tu ya’alaj yaan 136 u túul ba’alche’ láayli’ kuxa’an tak tu ja’atskab k’iinil le miércoles máanika’, ba’ale’ le béeykajo’ éem tak 90 tu jo’oloj jayp’éel horas. Tumen ma’ tu béeytal u k’uchul máak te’el jáal ja’o’, yéetel yóok’olal bix yanik k’áak’nabe’, ma’ béeychaj xan u biinsa’al nu’ukulo’ob k’a’anan ti’al u yáantalo’obi’, le beetik talamch ba’ali’.
Xak'alutskíinsa'an tumen: Sasil Sánchez Chan
