U mola’ayil Consejo Nacional de Evaluación de la Política de Desarrollo Social (Coneval) tu páayt’antaj u Noj Lu’umil México ti’al ma’ u xot’ik u meyaj ti’al u chíikbesik tu jach no’ojanil meyaje’, bix u p’i’isil óotsil kuxtal, bix u beeta’al evaluación yéetel bix u t’u’ulpachta’al politica social.
Ti’ jump’éel k’a’aytajil ts’íibe’, mola’aye’ tu ya’alaj mantats’ u meyaj ti’al ma’ u xóot’ol p’iisil ku beetik. Tu jo’oloj éejenta’ak k’eexil ti’ a’almajt’aan tu’ux ku sa’atal ukp’éel autónomo mola’ayo’obe’, ichilo’obe’ Coneval (u meyaje’ yaan u máansal tu k’ab Inegie’), Coneval tu ya’alaje’ tu jo’oloj 19 ja’ao’obe’ tu kanaj u mu’uk’ankúuns u nu’ukil metodología, je’el bix xan ba’ax unaj u ch’a’ajolta’al tumen u noj lu’umil México ti’al u xo’okol tu beel yéetel tu jach no’ojanil bix yanik óotsil kuxtal, wa pobreza.
Tu ya’alaje’, Conevale’ tu kanaj u yil tu’ux kaajilo’ob yaan óotsil kuxtal yéetel u mediail, le beetik xook ku beetike’ noj ba’ale ti’al u yóox jaatsilo’ob jala’ach tumen yéetele’ ku béeytal u patjo’oltal, u meyajta’al, u xak’alta’al yéetel u ma’alobkúunsa’al politica social.
“Conevale’ ku beetik páayt’aan ti’al u jach kaláanta’al ma’ u xóot’ol le noj meyajo’obo’, kéen k’e’exek a’almajt’aan satik jayp’éel mola’ayo’ob”, tu ya’alaj.
Beey túuno’, Conevale’ jump’éel mola’ay chuka’an ti’al meyaj, ts’o’oke’ ku jets’ik yéetel ku coordinartik evaluación yóok’ol política tu noj lu’umil México yaan ba’al u yil yéetel desarrollo social, beyxan le ku beeta’al ti’al políticas, nu’ukbesajo’ob ti’al kaaj, yéetel ba’alo’ob ku beeta’al tumen u mola’ayilo’ob jala’ach.
Xak'alutskíinsa'an tumen: Sasil Sánchez Chan
