Yéetel u chíikul jejeláas boono’ob, paaxo’ob yéetel ki’iki’ óolale’, u xjo’olpóopil u noj kaajil Jo’, Cecilia Patrón Laviadae’, tu chúunsaj u k’iimbesajil Carnaval de Mérida Amazónico 2025, tu kúuchil cha’an beeta’an Xmatkuil.
“Yáax juntéen u beeta’al carnaval ma’ táan u beetik k’aas ti’ lu’um yéetel táan u kaláanta’al ba’alche’ob, le beetik k’a’anan bix táan u yúuchul le k’iimbesaja’”, tu ya’alaj xjo’olpóop.
Ich papaxk’ab yéetel awato’obe’, kaaje’ tu much’ubáaj ti’al u k’a’amal “Rey Momo”, yéetel ti’al u ki’iki’ óolta’al paax, óok’ot, múuch’o’ob óok’ot, tu’ux yaan u yantal maanal 122 u p’éel actividades ichil cha’ano’ob, paaxo’ob yéetel e’esajilo’ob; lelo’oba’ káaj le 28 ti’ febrero máaniko’, yéetel yaan u ts’o’okol le 4 ti’ marzo ku taala’. Yaan u táakpajal 250 yucatanil artistas yéetel ti’ uláak’ noj lu’umo’ob.
En español: Color, alegría y compromiso ambiental en el Desfile Infantil del Carnaval Mérida Amazónico 2025
Xjo’olpóope’, láak’inta’ab tumen maanal 37 mil jo’ilo’ob, ts’o’oke’ te’elo’ tu ya’alaj Carnaval Amazónico 2025 táan u kaxtik u kaláantik yóok’ol kaab, le beetik tu páayt’antaj kajnáalo’ob ti’al u ka’ k’a’abéetkunsa’al ba’al, yéetel ti’al ma’ u yéek’kunsa’al kúuchil; ka meyajnak ti’ máak nu’ukulo’ob ku béeytal u ka’ meyaj wa biodegradables.
Tu súutukil u chúunul cha’ane’ k’a’abéetkunsa’ab sáasil ti’ drono’ob, ti’al ma’ u wa’awak’a’al pirotecnia, tumen beyo’ kaláanta’al u ba’alche’ilo’ob Reserva Ecológica Cuxtal. Cecilia tu ya’alaj te’el ja’aba’ Ayuntamientoe’ táan u jach kaláantik máaxo’ob ku bin cha’an, tumen maanal 3 mil ajkanan kaajo’ob táan u meyajo’obi’, beyxan paramédicos yéetel Protección Civil.
Tukulta’ane’ tu kúuchil Plaza Carnavale’ je’el u béeytal u k’amil maanal 36 mil máako’ob. Yáax juntéen kun béeytal u cha’antal circo xma’ ba’alche’ilo’ob, “Forever Circus”, ts’o’oke’ yaan xan junjaats pet-friendly; yaan xan tu’ux kun béeytal u biinsa’al peek’o’ob yéetel miiso’ob, ti’al u péektsilta’al u kaláanta’alo’ob, u máatalo’ob.
Xak'alutskíinsa'an tumen: Sasil Sánchez Chan
