Tu táan ya’abach máako’ob táakmuk’t jo’oljeak tu noj político k’íiwikil yaan tu noj lu’umil Méxicoe’, Xjala’ache’ tu jets’aje’ yéetel Donald Trumpe’ ma’ táan u bin xu’ulul táan óol, tsikbal yéetel múul meyaj, ba’ale’ “ma’ táan xan u cha’abal ka’aj úuchuk mix jump’éel k’aasil ti’ u méxicoil kaaj yóok’olal je’el ba’axak ka je’ets’ek tumen jala’acho’ob yéetel uláak’ táanxel kajil muuk’o’oh”, ts’o’okole’ tu ka’ jets’aje’ “tumen ku táanilkusa’al wíinike’”, u noj lu’umil Méxicoe’ ma’ táan u ch’éenel u múul meyaj ti’al ma’ u cha’abal u k’uchul fentanilo yiknal estadunideseil táanekelemo’ob.
Aktáan u ya’abach máak bino’ob láak’inaj yéetel táakmuk’taj te’el noj k’íiwiko’, ko’olel jo’olbesik u meyajil jala’ache’ tu ya’alaj u k’a’ananil úuchik u béeytal u je’elsa’al u bo’ota’al aranceles jump’éel winal, tumen beyo’ e’espaje’ “noj ba’alo’on, yéetel yaabilaj ku k’ubik máak ti’ u lu’umile’ mantats’ táanil yaan”, ts’o’oke’ tu tsibkaltaj bix ken u nu’ukt u yúuchul meyaj: yaan u mu’uk’ankúunsa’al mercado interno, yaan u yila’al ma’ u xóot’ol u yantal u ba’alumbáaj noj lu’um ti’al u tséentikubáaj yéetel ti’al u yantal energía ti’, yéetel yaan xan u péektsiltik ka yanak máax ts’áak taak’in ti’al inversión pública, beyxan u beeta’al ba’al tu noj lu’umil México ti’al u p’áatal konbil láayli’ te’el noj lu’uma’, yéetel xan u nu’ukbesajilo’ob Bienestar.
Xak'alutskíinsa'an tumen: Sasil Sánchez Chan
