Le lunes máanika’, u jala’achil u noj lu’umil Japóne’, káaj u konik arroz u líik’smaje’ ti’al u yilik wa je’el u yáantik kaaje’, tumen walkila’ táan u bin u ko’ojtal u tojol le janal je’el suuk u k’a’abéetkunsa’al te’el lu’umil je’elo’.
Yóok’olal le seten ooxol tu beetajo’, jp’áat mina’an le arrozo’ tumen ma’ béeychaj u jo’ochol tu beeli’, le beetike’ óoli’ ka’atéenchaj u tojol tu jo’oloj jump’éel ja’ab.
Beyxan ku tukulta’ale’, yaan kúuchilo’ob koonole’ táan u líik’siko’ob arroz yaan ti’obe’ ti’al u páa’tiko’ob u jach ma’alob k’iinil u koniko’ob. Uláak’ ba’ale’, u jala’achil noj lu’ume’, tu k’a’aytaj tu winalil agosto máaniko’, yaan u sajbe’entsil u jaats’ jump’éel «megaterremoto», le beetike’ yóok’olal saajkile’ yanchaj ya’abach máak tu xchukul mantaj arroz te’el k’iinako’obe’.
U noj lu’umil Japóne’ u líik’smaj kex óoli’ junp’éel millón u toneladasil arroz ti’al k’iinilo’ob kéen talamchajak ba’al. Le beetik túune’, noj lu’ume’ ts’o’ok u yantal u ch’a’ak le arroz u líik’smajo’, ba’ale’ yáax juntéen u k’a’abéetkunsa’al yóok’olal talamilo’ob ku yantal ti’ meyaj ku beeta’al ti’al u béeytal u k’ujsa’al arroz tak tu’ux k’a’abéet.
Ministerio de Agriculturae’ unaj u jets’ik antes ti’ le miércoles ku taala’, máax ti’ ken u ts’áaj le 150 mil toneladasil arroz yaan, tumen unaj u k’ujsa’al tak tu kúuchilo’ob koonol, jach u xanile’, ti’al u ts’o’okbal marzo. Beey túuno’, ministerioe’ tu ya’alaje’, wa tumen k’a’abéetchaje’ yaan u jóok’sik uláak’ kex 60 mil toneladasil arroz.
Xak'alutskíinsa'an tumen: Sasil Sánchez Chan
