Le lunes máanika’, loobilta’ab juntúul ti’ le palestinoil máak jo’olbes cha’an No other land, chíimpolta’ab yéetel Oscar, tu lu’umil Cisjordania, ma’ili’ ma’achak tumen israelí ejército, beey a’alab tumen juntúul u yéet meyaj yéetel uláak’ máako’ob il ba’ax úuchij.
Israelí ejercitoe’ tu ya’alaj táan u xak’altik ba’ax úuchij, ba’ale’ ma’ tu ya’alaj uláak’ ba’alo’obi’.
Jbeet cha’an Hamdan Ballal juntúul ti’ le óoxtúul palestinoil macha’ab tu kaajil Susiya, tu ya’alaj x-abogada Leah Tsemmel. Jkanan kaaje’ tu ya’alaj k’ala’abo’ob ti’ jump’éel base militar ti’al u ts’a’akalo’ob, ba’ale’ x-abogadae’ tu ya’alaj ma’ béeyak u t’aan yéetelo’obi’.
Basel Adra, uláak’ juntúul máax jo’olbes meyaje’, tu yilaj le ba’ax úucho’, ts’o’oke’ tu ya’alaje’ kex 24 u túul colonos -yaane’ u pixmaj u yich, yaane’ u ch’a’amaj u ts’oon, yéetel u jeelo’obe’ yéetel israelíil nook’o’obtu beetajo’ob loob te’el kaajo’. Soldados k’ucho’obe’ tu ts’onajo’ob palestinoilo’ob, ka’alikil colonoilo’obe’ ch’iinajo’ob yéetel tuunich.
En español: El mundo del cine exige la liberación del codirector de ‘No other land’, detenido por Israel
“Desde ka’aj suunajo’on te’el Oscaro’ yanchaj ataques tak wóok’ol sáansamal”, tu ya’alaj Adra ti’ The Associated Press. “Míin beey u sutiko’ob to’on k’aas yóok’olal cha’an tak beetaj. K-u’uyik beet castigo kti’al”.
No Other Land, chíimpolta’ab yéetel Oscar te’el ja’aba’, ku chíikbeesik bix u péek kaaj tu baantail Masafer Yatta ti’al ma’ u k’askúunta’al u kaajalo’obi’. Ballal yéetel Adrae’, tu ka’atúulal ti’ u kaajil Masafer Yattae’, tu múul beeto’ob cha’an palestinoil-israelíil yéetel jo’olbesaj cha’ano’ob israelíil Yuval Abraham yéetel Rachel Szor.
Xak'alutskíinsa'an tumen: Sasil Sánchez Cha
