Israeil jo’olpóopo’obe’ tu jáalk’abto’ob palestinoil jbeet cha’an tu náajaltaj jump’éel Oscar, k’ala’ab tumen ejército tu jo’oloj loobilta’ak tumen colonos judíos tu kaajil Cisjordania. Ichil ba’ax a’alab tumen u yatane’, jach lo’oloxa’ab aktáan u yotoch ka’alikil leti’e’ táan u táabsik ba’ax ku yúuchul.
Hamdan Ballal yéetel uláak’ máaxo’ob jo’olbes No Other Land, tu’ux ku chíikbesa’al talamilo’ob yaan ti’al máaxo’ob kuxa’an tu yáamil israelil muuk’e’, tu k’amajo’ob tu 97 u téenal u beeta’al u noj chíimpolal Premios de la Academia, tu noj kaajil Los Ángeles, ti’al u káajbal u winalil marzo ka tu náajaltaj chíimpolal tumen u asab ma’alobil documental le tu beetajo’obo’.
Le martes máaniko’, yéetel u yéek’kume’enil u yich, beyxan k’i’ik’el tu nook’e’, cha’ak’abta’abij. Leti’ yéetel uláak’ ka’atúul palestinoil máak láayli’ xan loobilta’abo’ob ka’aj anchaj u biinsa’alo’ob ti’ jump’éel kúuchil ts’akyaj naats’ te’elo’.
En español: Israel libera a Hamdan Ballal, director palestino ganador a un Óscar, tras una noche detenido
Ballale’ tu ya’alaj k’ala’ab ti’ jump’éel base militar, ts’o’oke’ beeta’ab u wenel tu yáam jump’éel aire acondicionado jach síis.
“Pixa’ab in wich 24 horas” tu ya’alaj ti’ The Associated Press. “Bul áak’ab síis. Jump’éel cuarto, ma’ páatchaj in wilik mix ba’ali’… tin wu’uyaj u t’aan le soldadoso’, tu che’ejtikeno’ob”.
Lea Tsemel, u abogadail le óoxtúul máako’obo’, tu ya’alaj chéen tu k’amajo’ob u jach p’íitil atención yóok’olal le loobilaj beeta’ab ti’obo’, yéetel leti’ bine’ ma’ béeychaj u t’aan yéetelo’obi’.
Yáax a’alabe’, taka’ab u poolo’ob tumen tu ch’ino’ob bin juntúul táankelem colono, ba’ale’ leti’obe’ ku ya’aliko’ob ma’ jaaji’.
Xak'alutskíinsa'an tumen: Sasil Sánchez Chan
