Úuchik u beeta’al IX Cumbre beeta’an tumen Celac, u jala’achil u noj lu’umil Méxicoe’, Claudia Sheinbaum Pardo, tu ya’alaj ma’alob wa ka beeta’ak jump’éel múuch’ yóok’olal u bienestar económicoil América Latina yéetel Caribe, ti’al beyo’ u yutsil bin ti’ tuláakal lu’umo’ob, yéetel ti’al u chíimpolta’al u ba’alumbáaj le kaajo’obo’. Tu beetaj páayt’aan ti’al ka yanak múul meyaj ti’al u yutsil péek wíinik, ti’al xan u chíimpolta’al táanxel kajil máako’ob, ts’o’oke’ tu ya’alaj ma’ uts u yilik bloqueo ts’a’aban yóok’ol Cuba yéetel Venezuelai’.
Ka’alikil ti’ yaan tu kaajil Tegucigalpa, Hondurase’, xmexicoil jala’ache’ tu ya’alaj “jach leti’e’ bejla’a’” u k’iinil u k’a’abéetchajal múul meyaj te’el baantaila’, je’el bix xan láak’inaj ti’al u meyajil jala’ach yéetel kaajo’ob, “ti’al u mu’uk’ankúunsa’al bix u núupul kaajo’ob, ka’alikil u chíimpolta’al tuláakal lu’umo’ob yéetel u cha’abal u kuxtal tuláakal noj lu’umo’ob, je’el bix jets’a’anil u mokt’aanilo’ob koonol tumen lalaj kaajo’ob”.
En español: Sheinbaum propone cumbre por el Bienestar Económico de AL y el Caribe en la Celac
Tse’ek tu beetaje’, xáanchaj 10 minutos, ts’o’oke’ tu ya’alaj “u k’a’abéetil u yantal múul meyaj ti’al u béeytal u péek wíinik, ba’ale’ tu’ux ka táanilkúunsa’ak máak”.
Ma’ tu chíimpoltik “peek’il, jumpáaykusaj kaaj, mix xan u tse’elel u páajtalil wíinik, mix xan u ts’a’abal u si’ipil u máakilo’ob kcontinentei’, tumen yaan ba’ax beetik u yantal u luk’ulo’ob tak te’el náachilo’”.
Ka’aj káaj u t’aane’, Tu ya’alaj xan: “bejla’e’ kin beetik páayt’aan ti’al ka beeta’ak tumen Celac uláak’ páayt’aan ti’al ka yanak uláak’ múuch’ yóok’olal u bienestar económicoil América Latina yéetel Caribe, ti’al u beeta’al u múul meyaj kaajo’ob tu’ux ka núupuk ba’ax ku beeta’al ti’al u yutsil náajal lu’umo’ob, tu’ux ka utsil xi’ik ti’ tuláakalo’ob yéetel tu’ux ka láaj chíimpolta’ak meyaj”.
Xak'alutskíinsa'an tumen: Sasil Sánchez Chan
