U kúuchil Departamento de Comercio ti’ u noj lu’umil Estados Unidose’ tu k’a’aytaj le lunes máanika’, yaan u na’aksal 20.91 u bo’olil aranceles ti’ u ya’abil p’aak’ ku jóok’sa’al México ti’al u biinsa’al konbil te’el noj lu’umo’. Lela’ yaan u káajal u chíimpolta’al le 14 ti’ julio ku taala’, tu jo’oloj tse’elek jump’éel mokt’aan tu’ux ma’ bin chíimpolta’ab u productoresil le noj lu’umo’, je’el bix a’alabiko.
“Le ba’ax jets’a’aba’ yaan u ts’áak u páajtalil ti’ estadunidenseil productores meyajtik p’aak ti’al u no’ojan ketikubáajo’ob koonol”, a’alab te’el k’a’aytajil ts’íibo’.
Tu ja’abil 2019e’, mexicoilo’ob meyajtik p’aake’ béeychaj u jets’iko’ob mokt’aan yéetel u yáax k’iinilo’ob meyajil jala’ach Donald Trump, ti’al ma’ u yantal u beeta’al jump’éel u xaak’alil antidumping, ti’al xan ka ts’o’okok ba’atel yóok’ol aranceles.
En español: EU impone arancel de 20.91 por ciento a jitomates mexicanos
Te’el k’inako’obe’, Estados Unidose’ tu ya’alaj jets’ t’aan beeta’ane’, ku béeykunsik u k’atik bej ti’ ba’axo’ob ma’ chìikpaj te’el mokt’aano’, ts’o’oke’ a’alan unaj u beeta’al xaak’al u ti’al.
U mola’ayil Secretaría de Economía de México, máax ti’ k’ubéenta’an ka béeyak u yantal tsikbal yóok’olal koonol-maan ku yantal tu noj lu’umil Méxicoe’, ma’ u núuk mixba’al yóok’olal le ba’ax táant u k’a’ayta’alo
Xak'alutskíinsa'an tumen: Sasil Sánchez Chan
