Ti’ le ts’ook lajun ja’abo’oba’, jkíim kex 3 mil 500 u túul paalal, le je’ela’ u k’áat u ya’alej juntúul sáansamal, úuchik u ts’áakubáaj u k’at Mediterráneo k’áak’náab central, desde tu xamanil África tak Italia, beey úuchik u ya’alal ti’ tsolmeyaj jóok’sa’ab tumen Unicef le martes máanika’.
Ku tukulta’al le beyka’aj paalalo’, ikil u yila’al xan jaytúul oaalal k’uch ichil máako’ob kóojo’ob te’el europeoil lu’umo’ -juntúul ti’ lalaj waktúul-, ka’aj jke’et xan yéetel le 20 mil 800 kimen máako’ob yanchaj ti’ le ts’ook lajun ja’abo’obo’.
Le jaytúul paalal a’alab jkíimo’, ma’ ojéela’an xan wa ma’ chuka’ani’, tumen ya’abach juntéenake’, kéen búuluk chemo’obe’ ma’ táan u yojéelta’al tumen ti’ máaxo’ob ku bino’obe’ mix juntúul ku kuxtali’, le beetik mix máak xan a’alik ba’ax le j-úucho’. Ts’o’okole’, ti’ lalaj lajuntúul paale’, uktúul tu juunal ku máan, mina’an u taataob yiknal, beey a’alab tumen u kúuchil Naciones Unidas ti’al paalal. “Ya’abach paalal ku ts’áakubáaj u k’at Mediterráneo centrale’ ku beetik tumen táan u yáalkab ti’ ba’ateltáambal, loobilaj wa óotsil kuxtal”, a’alab te’el tsool meyajo’, ts’o’okole’ tu ya’alaj “maanal ti’ chúumuk paalal yéetel táankelemo’ob k’áat chibta’abe’ tu ya’alaj yaan loobilaj beeta’ab ti’, yéetel u yóox jaats ti’ lelo’ ku ya’alik je’elsabo’ob kex ma’ u k’áato’obi’”. “Jala’acho’obe’ unaj u kaláantik u páajtalilo’ob paalal (...).
En español: Un menor de edad muere cada día al intentar cruzar el Mediterráneo central desde África: Unicef
Páajtalilo’ob mokt’anta’ab Convención sobre los Derechos del Niño ma’ tu chíimpoltik u xuulilo’ob kaaj, mix xan jáal ja’ob; ku láak’intik paalal je’el tu’uxak ka máanako’ob”, tu ya’alaj Regina De Dominicis, máax ku meyaj Unicef, máax ku ch’a’achibta’al te’el xaak’al meyajo’. Mola’aye’ tu k’a’ajsaje’ kex tumen tu ja’abil 2026 kéen káajak ku k’a’abéetkunsa’al Pacto Europeo sobre Migración y Asilo, najmal u chíimpolta’al je’el bix k’a’anan tukáakal ba’ax kaláantik u páajtalil yéetel u yutsil tuláakal paalal.
Xak'alutskíinsa'an tumen: Sasil Sánchez Chan
