U funeralil papa Franciscoe’ yaan u beeta’al le sábado ku taala’, ba’ale’ yaan u béeytal u ts’ook ila’al desde le miércolesa’, tu kúuchil basílica de San Pedro, beey úuchik u k’a’aytal tumen Vaticano.
U misail le funeralo’ yaan u beeta’al ti’ u vaticanoil kúuchil San Pedro, yóok’ol bej láayli’ beey u k’aaba’o’ yéetel tu’ux ts’ook ila’ab argentinoil jk’iin le Domingo de Resurrección máaniko’. “Tu k’iinil Pascuae’ tin wilaj Papae’ ka’anan. Tu ts’áaj u yóol tak tu ts’ook k’iinil, tak ka’aj xu’ul u ch’a’ak u yiik’”, tu ya’alaj cardenal franco-españolil François Bustillo, u obispoil Ajaccio. “Chúumuk ti’ u kaajal yaan ka’aj binij”, tu ya’alaj. U restosil Jorge Mario Bergoglioe’ ti’ yaan tu capillail tu’ux kaja’an ka’ach Santa Marta, tu’ux jkíim le lunes máaniko’, ka’alikil 88 u ja’abil, úuchik u tsa’ayal ti’ ictus, tu jo’oloj óoli’ jump’éel wi’inal jóok’ok ti’ u kúuchil ts’akyaj úuchik u talamtal u ch’a’ak u yiik’.
En español: Funeral del Papa será el sábado; fieles podrán despedirlo desde el miércoles
U wíinkilae’ oksa’an ichil u cajail, búukinta’an ti’ u chak casulla yéetel u sak mitra; tu k’abe’ ba’ak’ana jump’éel rosario yéetel kaláanta’al tumen suizoil máako’ob, beey úuchik u chíikbesa’al ti’ yáax oochelo’ob jóok’sa’ab lunes ka’aj k’i’itbesa’abo’ob le martes máanika’. Ichil ba’ax j-a’alab tumen italianail prensae’ táan u páata’al u kóojol kex medio millonil máako’ob te’el funeralo’, tu’ux táaka’an tak u jala’achil noj lu’umo’ob ti’ u jejeláas kaajilo’ob yóok’ol kaab, je’el bix j-ucraniail Volodymir Zelensky; ba’ale’ jrusoil, Vladimir Putine’ ma’ u tukultmaj u bini’. Juntúul ti’ le máaxo’ob k’a’ayt yaan u kóojol Romae’, leti’ u jala’achil Estados Unidos, Donald Trump, kex k’as ba’atelnaj yéetel Francisco yóok’olal táanxel kajil máako’ob. “¡Táan kts’íibóoltik kbin te’elo’!”, tu ya’alaj le lunes máaniko’.
Xak'alutskíinsa'an tumen: Sasil Sánchez Chan
