Úuchik u beeta’al u meyajil inteligencia criminal tumen u mola’ayil Fiscalía General del Estado de Oaxaca (FGEO), tumen múul meyajnaj yéetel uláak’ mola’ayo’obe’, béeychaj u kaxta’al u kimen wíinkilal activista Sandra Estefana Domínguez Martínez yéetel ti’al u yíicham Alexander Hernández Hernández, máaxo’ob jsa’atbesa’abo’ob tu k’iinil 8 ti’ octubre ti’ u ja’abil 2024.
Tu jo’oloj kaxta’ako’obe’, beeta’ab pericial xaak’alo’ob ti’al u béeytal u yojéelta’al máax ti’al le wíinkilal kaxta’abo’obo’. Jejeláas xaak’alo’obe’, múul beeta’ab tumen Fiscalía General del Estado de Oaxaca beyxan tumen Secretaría de Seguridad y Protección Ciudadana del Gobierno Federal, úuchik u k’ubéenta’al meyaj ti’ Coordinación Nacional Antisecuestro (CONASE), Centro Nacional de Inteligencia, yéetel u mola’ayil Secretaría de la Defensa Nacional (DEFENSA), Guardia Nacional, Fiscalía General del Estado de Veracruz, Policía Estatal de Oaxaca beyxan Comisión Estatal de Búsqueda de Personas del Estado de Oaxaca.
En español: Localizan en Veracruz cuerpos de la activista mixe Sandra Domínguez y su esposo, Alexander Hernández
U kaxta’al u wíinkilal le ka’atúul wíiniko’oba’, j-úuch tumen yanchaj jump’éel operativo ti’al u béeytal orde de cateo ichil jump’éel kúuchil yaan tu bejil La Ceiba tak Unión Progreso, tu kaajil Santiago Sochiapan, ichil u noj lu’umil Veracruz. Te’el kúuchilo’, kaxta’ab ka’ap’éel fosas tu’ux muka’an ka’ach u kimen wíinkilal Sandra yéetel Alexander, ka’aj ts’o’oke’ biinsa’abo’ob tu kúuchil Instituto de Servicios Periciales ti’al u béeytal u beeta’al científico xak’alta’alo’ob, tumen chéen ja’alil beey je’ets’ik leti’e’ máako’obo’.
Xaak’ale’ beeta’ab úuchik u yantal operativos tu lu’umil Oaxaca, u ya’abile’ jbeeta’ab tu Cuenca del Papaloapan, je’el bix xan tu lu’umil Veracruz, tu’ux kaxta’ab k’a’anan ba’alo’ob ikil u kaxta’al u yojéelta’al ba’ax úuchij.
Yáax ba’ax kaxta’abe’, leti’e’ camioneta u ti’al ka’ach le máaxo’ob sa’atbesa’abo’ob. Ti’ j-ila’ab tu kaajil Playa Vicente, Veracruz. Ts’o’oke’ ti’al 17 ti’ octubre ti’ u ja’abil 2024e’, kaxta’ab u teléfonoil Sandra Domínguez, tu kaajil El Nigromante, láayli’ Veracruz, le beetik mu’uk’ankúunsa’ab u kaxta’alo’ob te’elo’.
Xak'alutskíinsa'an tumen: Sasil Sánchez Chan
