Hollywoode’ tu tsikbaltaj le lunes máanika’, k’a’aytajil beeta’ab tumen jala’ach Donald Trump tu’ux a’alabe’ yaan u ts’a’abal aranceles ti’al cha’ano’ob kun meyajtbil táanxel Estados Unidos, ba’ale’ máaxo’ob ku meyajtiko’ob ba’al beyo’, tu ya’alajo’ob ma’ uts le ba’ax jets’a’abo’.
“Kux túun wa k’a’abéet u na’akal Tom Cruise te’el torre Eiffelo’, ba’ax túun ken kbeetej, yaan wáaj kbin tu réplicail le torreo’. Mina’an u beelal, tu ya’alaj Jonathan Handel, juntúul abogado ku meyaj te’el medioo’. Tu ch’a’achibtaj cha’ano’ob je’el bix Misión Imposible, tumen le je’elo’obo’ táanxel kaajo’ob tu’ux beeta’ano’ob.
Ti’ ts’íib jóok’sa’ab tu red socialil Truth Sociale’, Trumpe’ tu k’áataj ti’ Departamento de Comercio “ka káajak u bo’ota’al arancel yóok’ol u 100% ti’al je’el ba’axak cha’anil ka kóojok Estados Unidos ba’ale’ táanxel kaajil beeta’an”.
“To’one’ k-k’áat ka yanak tuka’atéen cha’ano’ob beeta’an EU”, tu ya’alaj.
“Táan k-ilik ba’ax kun úuchul”, tu núukaj ti’ redes u secretarioil Comercio, Howard Lutnick.
Kex tumen Casa Blanca ma’ tu tsolaj bix kéen bo’ota’ak le ba’ax jets’a’abo’, ya’abach cha’ano’obe’ ku beeta’al yéetel digital nu’ukulo’ob, kéen ts’o’okoke’ ku máansa’al Internet, ba’ale’ le je’elo’ tu beetaj u yéemel acciones ti’ mola’ayo’ob je’el bix Netflix, Disney yéetel Paramount.
“Le je’elo’ u meyajil propiedad intelectual”, tu ya’alaj Handel. “Ku béeytal a manik a boleto ti’al a wokol cine, ba’ale’ ma’ tu béeytal a manik jump’éel cha’an je’el bix u ma’anal jump’éel nook’ wa jump’éel coche”, tu ya’alaj.
Le ba’ax tu jets’aj Trumpe’ ku yúuchul ka’alikil Hollywoode’ táan u kaxtik u ka’ líik’il.
Los Ángelese’ láayli’ u na’ata’al beey kaaj tu’ux suuk u náaysa’al u yóol Estados Unidos, ba’ale’ le ja’ab máaniko’, jach chéen jump’éel cha’ano’ob beeta’abi’.
Xak'alutskíinsa'an tumen: Sasil Sánchez Chan
