K'iintsil
Efe
08/05/2025 | Islamabad, Pakistán
U Ejércitoil Pakistáne’ tu ya’alaj le miércoles máanika’ yanchaj 31 kajnáal kimen yéetel uláak’ 57e’ loobilta’an úuchik u beeta’al k’aas yóok’ol India ikil táan ts’o’ots’onajil Línea de Control, u xuul lu’umil ichil ka’ap’éel noj lu’umo’ob táan u ba’ateltiko’ob Cachemira.
“Paach ti’ le k’aak’as loobilaj beeta’ab India tu táan kaaj ook’najeake’, jna’ak le jaytúul máako’ob loobilta’ab yéetel kíinsa’abo’”, tu ya’alaj ti’ k’a’aytajil tsikbal beeta’ab tumen máax jo’olbesik oficina de medios ti’ le Ejércitoo’, jteniente General Ahmad Sharif.
“Ichil ba’ax jts’a’ab k’ajóoltbil tak walkila’, a’alabe’ táan u ya’abta’al kaaj ku loobilta’al tumen mantats’ táan ts’oon Línea de Control, yéetel tumen kex jeets’el ma’ unaj u yúuchul ts’oone’, Indiae’ ma’ táan u chíimpoltik”, tu ya’alaj. Loobilaj beeta’abe’, j-úuch ka’alikil táan u bin u sáastal, ts’o’okole’ kaxta’ab u ts’o’onol jayp’éel u kaajilo’ob tu lak’inil Punjab, tu’ux ku taal u kóojol lu’um yéetel India, beyxan Cachemira, ti’alinta’an tumen Pakistán.
Ichil ba’ax tu ya’alaj Indiae’, ts’o’ots’onaj yanchaje’, chéen "infraestructura terrorista" yanchaj ti’ bolonp’éel kúuchilo’ob, ts’o’oke’ ma’ kóoj ti’ kaaji’, mix xan tu beetaj k’aas ti’ económico wa militar paquistaníil kaaj.
Ba’ale’, Pakistane’ tu takaj u pool India tumen loobilaj tu beetaje’, tu k’askúuntaj ba’al u ti’al kaaj, tak mezquitas yéetel hidroeléctricas, ts’o’oke’ lelo’ kúulpach ti’ ba’ax a’alab te’el Nueva Delhio’.
U yáax ministroil paquistaníil, Shehbaz Sharif, tu ya’alaj Indiae’ yaan u yilik u k’aasil yóok’olal loobilaj tu beetaj, je’ex úuchik xan u ya’alal tumen uláak’ máako’ob táaka’an ichil Jala’ach wa tumen Ejército.
Comité de Seguridad Nacional de Pakistán, noj mola’ay ku kanan te’el noj lu’umo’, tu ts’áaj u muuk’ Fuerzas Armadas ti’al u núukik loobilaj beeta’ab tumen India, “tu k’iinil yéetel le bix kéen u tukultej”.
Xak'alutskíinsa'an tumen: Sasil Sánchez Chan
