Najil xook jeets’el tu cheemil Cuauhtémoce’, jump’éel velero óoxp’éel u mástiles ti’alinta’an tumen Marina Armada de México, tu’ux jna’aka’an ka’ach kex 200 máako’obe’, tu p’uchubáaj yéetel Puente de Brooklyn, tu ja’il East River, tu kaajil Nueva York, tu yáak’abil le sábado máanika’.
Tu jo’oloj jéenanta’ak puentee’, káaj u máan kaxtbil yéetel u yáanta0al máaxo’ob jlúubo’ob ich ja’, beey jts’a’ab k’ajóoltbil tumen u bomberosil The New York Post.
Máax jo’olbesik Secretaría de Marina Armada de México (Marina), Raymundo Pedro Morales Ánfgeles, tu ya’alaje’ “jach sáasil” kun beetbil u xaak’alil le ba’ax úucho’.
En español: Buque escuela 'Cuauhtémoc', de la Armada de México, choca contra el Puente de Brooklyn de Nueva York
Ti’ k’a’aytajil tu beetaj ti’ redes socialese’, almirantee’ tu yaj óoltaj loobilaj úuchij tumen tak le domingoo’ ojéela’an ka’atúul máak kíimij, yéetel uláak’ ti’ 20o’ob úuch loob, 11 ti’ le je’elo’obo’, jach talam yaniko’ob.
Jala’ach Claudia Sheinbaume’ tu ts’áaj k’ajóoltbile’ le ka’atúul máax kiime’, juntúul cadete yéetel juntúul marino, ts’o’oke’ séeb úuchik u ts’aatáanta’al máaxo’ob k’a’abéetchaj áantaj.
U jala’achilo’ob kaaje’ tu ya’alo’ob cheeme’ tu p’uchubáaj bin tumen éem u muuk’ ka’aj káaj u bin, ba’ale’ xjala’ache’ tu k’áataj ka páa’ta’ak xaak’alo’ob kun beetbil ti’al u béeytal jach ba’ax úuchij.
Xak'alutskíinsa'an tumen: Sasil Sánchez Chan
