Tu k’iinil jo’oljeak 21 ti’ julioe’, u kúuchil Centro Regional para la Salvaguardia del Patrimonio Cultural Inmaterial de América Latina (CRESPIAL) tu beetaj jump’éel múuch’ tsikbal ti’ Internet tu k’aaba’taj
Miradas del patrimonio cultural inmaterial de Latinoamérica frente al COVID-19: presente y futuro, tu’ux t’a’an tsikbal óoxtúul máak: Jaime Araoz, juntúul u jka’ansajil its’at yéetel miatsil; Doris Ochoa, máax jo’olbesik u nu’ukbesajil máasewal jala’ach tu lak’inil Amazonía ti’ u múuch’kabil Gaia Amazonas, ti’ u lu’umil Colombia yéetel Adriana Molano, máax jo’olbesik CRESPIAL.
Máaxo’ob táakpajo’obe’ tu tsikbaltajo’ob ba’ax táan u yúuchul yéetel le k’oja’anila’, tumen yaan tu’uxe’ ts’o’ok u yoksik saajkil yéetel chi’ichnakil ich kaaj, ts’o’ok u beetik u kíimil ch’ija’an máako’ob, máaxo’ob jach kaambanaja’ano’ob, ba’ale’ kaajo’obe’ k’anantako’ob xan ti’al u aktáanta’al le k’oja’anila’, ya’abach máako’obe’ suunaj tu kaajalo’ob yóok’lal ba’ax ku yúuchul.
Jala’ache’ ts’o’ok u jets’ik ba’ax najmal u beeta’al ti’al u kaláantikubáaj kaaj ti’ u k’oja’anil COVID-19 ba’ale’ ma’ táan u chíimpoltik bix u kuxtal maaya’ob, táan u jets’ik ba’al yóok’ol máax ka’aja’an ti’ noj kaaj, beey tu ya’alaj Sasil Sánchez máax jo’olbesik u meyajil kaambal Solyluna.
“To’one’ ya’abo’on, kaaje’ ya’ab bix u tuukul, ma’ táan u páajtal u je’ets’el ba’al wa chéen ti’ u tuukul máak ti’ noj kaaj”, tu tsikbaltaj xan.
Edición: Ana Ordaz
