Yéetel u chak nooko’obe’, yaba’ach máaxo’ob tu líik’saj u t’aano’ob le domingo máanika’, tu bejilo’ob La Haya ti’al u k’áatiko’ob ti’ neerladail jala’ache’ ka yanak u jets’ik ba’ax ken u beet tu táan máaxo’ob “kiinsik wíinik” tu kaajil Gaza.
Te’el súutuko’ táakpaj kex 150 mil máako’ob, beey a’alab tumen máaxo’ob jo’olbes u beeta’al. U múuch’ilo’ob máak kaláantik ka chíimoplta’ak u páajtalil máako’ob, je’el bix Amnistía Internacional yéetel Oxfame’, tu beeto’ob páayt’aan ti’al yanchaj te’el kaajo’, ts’o’oke’ k’uch tak Corte Internacional de Justicia. Máaxo’ob tu líik’saj u t’aano’obe’, tu k’a’abéetkunso’ob u banderasil Palestina yéetel tu yawato’ob «Stop al genocidio», tu bono’ob yéetel chak u k’íiwikil le noj kaajo’.
Béeychaj u xo’okol u ts’íibil «Ma’ a paakate’ex yaanal tu’ux, beete’ex wa ba’ax», «Je’else’ex neerladesil táakmuk’tajil» yéetel «Mak a chi’ex kéen wenek paalal, ma kéen kíimiko’obi’». Beyxan páayt’anta’ab nerlandesil jala’ach ka u kaxt uláak’ bix u beetik ti’al u je’elsa’al Israel. «U kajnáalilo’ob Gazae’ ma’ táan u béeytal u páa’tajo’ob, ts’o’oke’ Países Bajose’ unaj u beetik tuláakal ba’ax ku páajtal ti’al u kaxtik ka ch’éenek u kíinsa’al máak», a’alab te’el xíimbalil líik’saj t’aano’.
Neerlandesil yáax ministro tu bin u jóok’ole’, Dick Schoof tu ts’íibtaj ti’ Xe’: «Ti’al tuláakal máaxo’ob yaan La Hayae’, kin wa’alikte’ex: k-ilike’ex yéetel k-u’uyike’ex». «Tu ts’ooke’, jump’éelili’ ba’ax k-k’áati’: u xu’ulsa’al loobilaj Gaza tu séebanil kun páajtal».
Xak'alutskíinsa'an tumen: Sasil Sánchez Chan
