Relámpagos FC, múuch’ báaxal ku jelbesik u kuxtal paalal yéetel síndrome de Down tu kaajil Cancún

Lalaj lunes yéetel juevese’, kéen u chuk 6 u taal u chíinik k’iine’, ku kuxkíinsa’al u canchail kóochak’ booláa 5 tu kaajil Cancún, Quintana Roo. Ma’ je’el ba’axak campoili’, kéen okok u ajbáaxalilo’ob Relámpagos FCe’ yaan ba’ax ku k’éexel: kúuchile’ ku much’ik che’ej, ki’iki’ óol yéetel náayo’ob. Te’elo’ mina’an xchukul awat, mix k’aak’as keet. Chéen ki’imak óolal, éet yantal yéetel u yaabilajil deporte, tumen u ti’alo’obe’, ma’ obligación u bino’ob báaxali’, chéen u jach jats’uts súutukil le k’iino’.

Relámpagos Cancún FC junmúuch’ báaxal táan u ye’esik uláak’ u yichil ba’ax suuk k-ilik ti’ múuch’ báaxalo’ob futbol. Ti’ le je’elo’, táaka’an táankelem paalal yaan ti’ob síndrome de Down. Müuch’e’ ts’o’ok u na’atike’, ti’ lalaj kóochab, gol, yéetel péeksajile’, ku chíikbesik u sáasilo’ob.

Te’el múuch’a’ béeychaj ba’ax ku tukulta’al ma’ táan u béeytal ka’achij, yaan taatatsilo’ob ma’ jp’áato’ob kutal ka’aj a’alab ti’ob “ma’ táan u béeytal”, beyxan yaan táankelem paalal sáansamal u ye’esik u ki’imak óolalo’ob kéen báaxalnako’ob. Tu beel u búukintik u uniformes ajbáaxalo’ob, máaxo’ob ku yu’ubik tuláakal tsolnu’uk ku beeta’al tumen máax jo’olbesik yéetel máax káajs múuch’, Lluvia Buenfil.

Leti’e’ mix juntéen tu tukultaj wa meyaj tu beetaj ka’aj tu ts’o’oksaj u xooke’ yaan u súutul noj meyaj u ti’al. Tu ja’abil 2017e’, ka’alikil u kaxtik bix ken u ts’o’oks u xookil licenciatura Educación Física y Deporte, tu yóotaj u beetik u prácticas profesionales tu mola’ayil Fundación Pro-Síndrome de Down Cancún. Ti’ túun káaj u múul yantal yéetel táankelemo’ob máax tsaayal ti’ u ya’abil síndrome de Down.