U campamentoil Mystic, tu kaajil Texase’, tu jets’aj jkíim 27 máak muuch’ul ka’ach te’elo

Inundaciones en Texas dejan más de 100 personas muertas, incluidas las niñas del Campamento Mystic y sus guías

K'iintsil

Meyaj ku k’aaba’tik campamento de verano cristiano Mystic, táan ka’ach u beeta’al tu jáal río Guadalupee’, tu jets’aj le lunes máanika’ jkíim 27 u túul wíinik táan ka’ach u táakpajalo’ob te’el meyajo’, ichil campistas yéetel instructores.

Lelo’ úuchik u ka’antal u ja’il le ríoo’, ka’aj búul u chúumuk-noojolil Texas le fin de semana máanika’, ts’o’oke’ lelo’ yaan u beetik u yantal uláak’ kimeno’ob, ba’ale’ tak walkila’ ts’o’ok u náakal 82 u túulal ts’o’oke’ u ya’abile’ paalal, beey a’alab tumen u jo’olpóopilo’ob kaaj. ”Jach luba’an k-óol je’el bix u ti’al u láak’ le máaxo’ob tu pe’erto’ob wa máax ti’ le k’aasil ba’al úucha’.

Táan kpayalchi’ tu yóok’olalo’ob”, a’ala’ab ti’ k’a’aytajil ts’íib. K’a’amkach cháake’ tu beetaj u séeb ka’antal u ja’il río Guadalupe, ka tu bulaj yéetel tu kóolaj yéetel mejen najo’ob, le beetik jp’áat k’aalil máak ichili’ wa jsa’atij, ichilo’ob túune’, ti’ yaan le 27 máako’ob ti’ u campamentoil Mystic. Áantaj máako’obe’ táan u jach meyajo’ob ti’al u kaxta’al máaxo’ob ma’ ojéela’an tu’ux ts’o’oka’ano’ob.

En español: Inundaciones en Texas dejan más de 100 personas muertas, incluidas las niñas del Campamento Mystic y sus guías

“Táanili’ kt’aan yéetel u jo’olpóopilo’ob le kaajo’, máaxo’ob ma’ ch’éenek u meyajo’ob ti’al u kaxta’al xch’úupalalo’ob saatal”, a’alab tumen campamento.  Yóok’olal beyka’aj k’aasil ts’o’ok u yúuchule’, campamentoe’ tu k’áataj u kaláanta’al ba’ax ku ya’alal yéetel ba’ax ku k’i’itbesa’al yóok’olal baatsilo’ob táan u máansiko’ob le talamila’. Jo’olpóopo’obe’ ts’o’ok u k’áatiko’ob ti’ kaaj ka’aj u jach kaláantubáaj yóok’olal le ja’ ku ka’antal te’el baantao’, tumen táan cháak te’el k’iiino’oba’ kex ma’ jach u k’iinili’.

Áantaj máako’obe’ táan u jach meyajo’ob ti’al u yilko’ob beyka’aj ba’alo’ob t’so’ok u k’astal te’elo’ yéetel ti’al u kaxta’al máaxo’ob saatal.  Tu yáak’abil domingoe’, Larry Leitha Jr., juntúul u alguacilil Kerre’, tu’ux jach chíika’an k’aasil ts’o’ok u yúuchule’, tu k’a’aytaje’ ts’o’ok u yantal 68 kimen máak, ts’o’oke’ ti’ le je’elo’obo’ 40e’ nojoch máako’ob yéetel 28e’ paalal. 

Ti’ le je’elo’obo’, 18e’ ma’ ojéela’an máaxo’obi’, beyxan 10 u túul paalal. Beyxan yaan uláak’ 14 ti’ uláak’ naats’ kaajo’ob: 6 tu kaajil Travis; 3 Burnet, 2 Kendall, 2 Williamson yéetel 1 Tom Green, a’alab tumen canal CNN.

Xak'alutskíinsa'an tumen: Sasil Sánchez Chan