U paalill 19 péetlu’umo’obe’ ku tsikbaltik u na’ato’ob yéetel ba’axo’ob u yojelo’ob, tu lu’umil Yucatán

U mola’ayil Sedeculta, ikil táan u múul meyaj yéetel Secretaría de Cultura del Gobierno de México, táan u ye’esio’ob ti’ paalal beyxan táankelemo’obe’ ba’axo’ob táakbesik u ba’alumbáaj, wa patrimonio cultural, ti’ u noj lu’umil México.  

Meyaje’ káaj le 22 ti’ julio jmáana’ tu’ux táan u táakpajal maanal 150 paalal yéetel táankelemo’ob. Le je’ela’ u wuktéenil u beeta’al Encuentro Nacional de Saberes Locales, tu’ux ku kaxta’al u yantal tsikbal yéetel ka kaláanta’ak u kuxa’an patrimonioil kaajo’ob, ichil u nu’ukbesajil Alas y Raíces.

Múuch’tambale’ taan u ts’o’okol le 25 ti’ julio ku taala’. Táan u táakpajal 19 u p’éel péetlu’umo’ob máaxo’ob táan u tsikbaltiko’ob ba’ax u yojelo’ob beyxan u miatsil u kaajo’ob. Beyxan, uláak’ paalal ti’ yaanal 13 péetlu’umo’obe’ yaan xan u táakpajalo’ob, de virtual, tumen yaan u ye’esiko’ob 13 u p’éel kóomtak cha’ano’ob e’esik ba’ax seen ba’alo’ob u yojelo’ob.

Tu súutukil úuchik u chúunsa’al meyaje’, máax jo’olbesik Sedecultae’, Patricia Martín Briceño tu ya’alaj ba’axten k’a’anan ti’al u jala’achil u lu’umil Yucatán ka béeyak u k’ujsa’al miatsil yiknal tuláakal máak, je’ex beyka’aj u ja’abil máak yéetel je’el tu’uxak u kaajal.

“Ktukultik tuláakal paalal yéetel táankelemo’obe’ unaj u k’ajóoltiko’ob, u ki’ óoltiko’ob yéetel u chíikesik u miatsilo’ob, u mootso’ob yéetel ba’axo’ob ba’al u yojel. Le beetike’, ka t-ojéeltaj yaan u beeta’al múuch’tambal wey Yucatáne’ jach táaj ki’imakchaj k-óol”, tu ya’alaj tu kúuchil Centro Cultural de la Niñez Yucateca (Cecuny). 

Ka’aj t’aanaj máax beetik u Coordinadora Nacional de Desarrollo Cultural Infantil de ichil u mola’ayil Secretaría de Cultura federal, Guillermina Pérez Suárez, tu ya’alaj meyaje’ béeychaj u beeta’al tumen yaan máaxo’ob tu ts’áaj u yóol u ti’al. “Ku ts’áakto’on u páajtalil k-ojéeltik tu’ux ktaak yéetel tu’ux kbin, ti’al kmúul kaambal”, tu ya’alaj. 

Beyxan tu ts’áaj u níib óolalil Sedeculta; máax jo’olbesik DIF Yucatán, Wendy Méndez Naal, yéetel ti’ jala’ach Joaquín Díaz Mena, tumen ku chíimpoltiko’ob ba’ax u yojel paalal yéetel táankelemo’ob, tumen yaan ba’al u ya’alo’ob.