“Xma’ keetil kuxtal yéetel chi’ichnakil siijil yéetel sistemáa’ ma’ táan u yáantik máak, ts’o’okole’ le ken ktukult táan u chan je’elel ba’al yóok’lal bix u beeta’al u suut taak’in te’e k’iino’oba’, ku taal tpool le bix yanik ba’al ka’achij, ba’ale’ u jach k’a’ananile’ u káajal ktukultik uláak’ bix je’el u páajtal u túumben beeta’al u suut taak’in, tumen leti’e’ páajtalil táan u ts’a’abal to’on tumen COVID-19, le beetik kin tukultik le áanalte’a’ ku yáantaj ti’al u káajal ktukultik, ti’al u kanik máak uláak’ bix je’el u páajtal u beetik u ya’abkunsik u taak’ino’ob”, beey tu ya’alaj Morgan Simon, máax ts’íibt u áanalte’il Impacto Real. Las nuevas economías del cambio social.
Ku tukultike’ bix u na’atik ba’ax táan u yúuchul walkila’ jach k’a’anan, “tumen táan k-ilike’ le bix k-k’a’abéetkunsik taak’ine’ ma’ táan u yúuchul tu beel, mix ti’al máax ayik’al mix ti’ máax mina’ani’”.
U meyaje’ ts’o’ok u sutk’esa’al ich káastelan, ts’o’okole’ ku ko’onol ti’ Amazon. Xts’íibe’, máax síij Estados Unidose’, ts’o’ok junk’aal ja’abo’ob káajak u meyajtik ba’ax ku k’aab’atik inversión de impacto; ti’ le je’ela’ ku kaxta’al ka’aj áantak meyajo’ob ku beeta’al ich kaaj yéetel ti’al u yutsil lu’um tu’ux ku kaxta’al ka chan béeyak u suut taak’in, ba’ale’ ka yanak xan u yutsil kaaj.
Ku tukultike’ le meyajila’ táan u bin ch’a’anukta’al bix u beeta’al tumen ya’ab máak taak u meyaj ti’ kaaj yéetel u k’áat áantaj, tumen beey u mu’uk’ankúunsa’al meyajo’ob je’el u beta’al tumen kajnáalo’obe’.
