K'iintsil
La Jornada Maya
11/08/2025 | Mérida, Yucatán
U mola’ayil Secretaría de la Cultura y las Artes (Sedeculta) tu k’a’aytaj u yáax ketlamil Premio Estatal de Poesía en Lengua Maya Isaac Carrillo Can, yéetel le ku chíimpolta’al meyaj tu beetaj jyucatecoil ts’íib yóok’olal maaya t’aan.
Le ketlama’ k’a’anan ti’al meyajo’ob táan u beetik U Jala’achil u Lu’umil Yucatán, ikil u k’ubéentmaj meyaj ti’ u mola’ayil Sedeculta, ti’al u ka’ kuxkíinsa’al maaya t’aan ichil u kuxtal kaaj, ka’alikil xan u nojba’alkunsa’al ichil its’at ikil u ts’íibta’al tsikbalo’ob yéetel k’aay tuukulo’ob.
Beyxan, táaka’an ichil meyaj ku beeta’al tumen Renacimiento Maya ti’al u mu’uk’ankúunsa’al políticas públicas, tu’ux ka chíimpolta’ak u páajtalil u t’a’anal maaya tu lu’umil Yucatán.
Le beetike’, u mola’ayil Sedecultae’ tu yéeyaj u ch’a’ak u k’aaba’ Isaac Carrillo Can ti’al u k’aaba’inta’al u ketlamil k’aay tuukul, tumen beyo’, ku chíimplta’al meyaj beeta’ab tumen juntúul noj jts’íib ich maaya t’aan, máax tu náajaltaj tu ja’abil 2010 u chíimpolalil Premio Netzahualcóyotl de
Literatura en Lenguas Mexicanas, jump’éel ti’ le maas k’a’anan yaan ichil máaxo’ob ku ts’íib ichil u máasewal t’aanilo’ob tu lu’umil América Latina.
Ichil ba’ax ku xo’okol tu ju’unil le ketlamo’, yaan u béeytal u táakpajal ajts’íibo’ob ich maaya t’aan wa ts’o’ok 18 u ja’abilo’ob. Unaj u k’u’ubul jump’éel meyaj ts’íibta’an ich maaya yéetel mix juntéen yáax ts’a’abak k’ajóoltbil wa tu’ux. K’a’abéet kex 50 u wáalal u jach p’íitil yéetel kex 80 u jach ya’abil.
U k’aaba’ máaxo’ob kun yéeyik meyaj kun chíimpoltbile’, yaan u k’a’ayta’al xan kéen a’alak máax kun náajal. Lela’ yaan u yúuchul tu k’iinil 7 ti’ noviembre ti’ le ja’aba’.
U k’iinil ti’al u k’u’ubul chíimpolal ti’ máax kun náajale’, yaan u beeta’al tu k’iinil 23 ti’ noviembre tu noj kaajil Jo’. U náajalile’, 25 mil pesos.
Ti’al u yojéelta’al uláak’ ba’alo’ob yóok’olal le ketlamila’, ku páajtal u xak’alta’al u redes oficiales (Facebook beyxan Instagram), je’el bix xan u kúuchil web Secretaría de la Cultura y las Artes.
Xak'alutskíinsa'an tumen: Sasil Sánchez Chan
