Yaan u k’a’abéetkusa’al 60 mil mdp ti’al u beeta’al u ka’ yantal ja’ ku meyaj ti’ wíinik: Conagua

U jala’achil u noj lu’umil Méxicoe’ yaan u jatsik ti’al u wakp’éel ja’abo’ob meyaje’, maanal 60 mil millonesil pesos ti’al u meyajta’al 2 mil millonesil metros cúbicos ja’, lela’ óoxtéen ti’ le beyka’aj ku k’a’abéetkunsa’al ichil jump’éel ja’ab tu noj kaajil Ciudad de México, beey úuchik u ts’a’abal k’ajóoltbil tumen u meyajnáalilo’ob Comisión Nacional del Agua (Conagua).

Tu ja’atskab k’iinil le miércoles máanika’, ts’a’ab k’ajóoltbil Plan Nacional de Tecnificación, xjala’ach Claudia Sheinbaume’ tu ya’alaj yéetel le meyaja’ táan u kaxta’al u ka’ beeta’al u meyaj le tu’ux ku yúuchul jóoyab (te’el tu’ux yaan paak’áalo’ob) ti’al u yantal ba’al u jaant wíinik, yéetel ti’al u ka’ k’ujsa’al ti’ noj kaajo’ob  tu’ux talam u k’uchul.

Máax jo’olbesik Conagua, Efraín Moralese’, tu tsolaje’ jump’éel ba’al k’a’anane’, lei’te’ 76 por cientoil ja’ ku k’a’abéetchajal ti’al u yúuchul jóoyab, le beetike’ yaan u kaxta’al u tecnificarta’al maanal 200 mil hectáreas ti’al u beeta’al janabe’enba’alo’ob yéetel jump’íit menos ja’, beyxan u beeta’al u ka’ yantal 2 mil 800 millonesil metros cúbicos.

“Lela’ jump’éel nu’ukbesaj mix juntéen yáax yanak te’el noj lu’uma’, mix juntéen yáax yanak nu’ukbesaj ti’al u ka’ k’a’abéetkunsa’al tumen wíinik”, tu ya’alaj.

Ka’aj t’aanaj u subdirector generalil Infraestructura Hidroagrícola ti’ u mola’ayil Conagua, Aarón Mastache, tu ya’alaje’, tu técnicoil meyaje’ yaan u ts’aatáanta’al u beel ja’ ku k’uchul tak tu’ux ku yúuchul jóoya’ab ti’al u yutskíinsa’al, tumen tu beelilo’ob ja’e’ ya’ab ja’ ku p’áatali’, beyxan presas ts’o’ok u k’astal, sistema ti’al jóoyab ku meyaj tumen ku búulul, le beetik ya’abach ja’ ku p’áatal chéen beyo’ tumen ku bin yaanal tu’ux wa ku sa’ap’al.