Ich ki’ki’ óole’, Meme del Reale’ k’uch Teatro Armando Manzanero ti’al u yáax e’esajil k’aay tu juunal

Walkila’, tu noj lu’umil Yucatáne’, táan u yila’al noj cha’ano’ob miatsil, ba’ale’ beyxan táan u péektsilta’al, u k’a’ayta’al yéetel u k’i’itbesa’al ba’axo’ob ku meyajta’al te’el noj lu’uma’. Beey chíikpaj le fin de semana máaniko’, úuchik u béeytal u cha’anta’al Meme del Real, tu kúuchil Teatro Armando Manzanero.

U súutukil ki’iki’ óol yéetele’, xma’ bo’olil úuchik u beeta’al. Nupa’ab paax yéetel k’aay. U’uya’ab bix u k’aay chéen tu juunal, ba’ale’ beyxan yanchaj junsúutuk yéetel Café Tacuba.

U yantal le paaxa’, meyajta’ab tumen Secretaría de la Cultura y las Artes (Sedeculta) yéetel Secretaría de Fomento Turístico del Gobierno de Yucatán (Sefotur), tu’ux táakpaj xan xk’aay Val Hozu, máax yaan u estiloil dreamy-pop.

P’el úuchik u máan las 8 áak’abe’, Val Hozue’ tu chúunsaj u súutukil le k’aayo’, ts’o’oke’ jchu’up le kúuchilo’. Beey túuno’, yóok’olal múul meyaj beeta’ab tumen mola’ayo’obe’, táan u bin u mu’uk’ankúunsa’al u jejeláasil meyao’ob miatsil yaan tu lu’umil Yucatán.

U k’aay yéetel u paaxe’, u chíikulal jats’uts yéetel no’ojan miatsil ku beeta’al tumen táankelemo’ob te’el lku’uma’, ts’o’oke’ táan xan u bin u mu’uk’anchajal u beel rock. pop, indie yéetel alternativo. Beey túuno’, Meme del Real yéetel u múuch’ paaxile’ tu beeto’ob u yawat máaxo’ob ku cha’an, beyxan u papaxk’a’abta’alo’ob, úuchik u ki’ óolta’al u paaxil rock.

Ichil ba’axo’ob k’aya’ab tumen Meme del Reale’, yanchaj “Aunque sea”, “Princesa” yéetel “Todo se marchó”. Ma’ xan tu’ux u k’ayik “Eres”, jump’éel ti’ le k’aayo’ob maas jach uts binja’an ti’ ichil meyaj u ts’íibtmaj. Del Reale’ tu chíimpoltaj xan Armando Manzanero, ts’o’oke’ tu ya’alaje’, je’el u yutstal tu yich u ts’íibtik ka’ach u k’aayil “Esta tarde vi llover”.