Yucatáne’ táan u káajsik u xíimbal ti’al u mu’uk’ankúunsa’al tukáatéen maayat’aan

U jala’achil Yucatán Joaquín Díaz Mena tu k’a’aytaj táan u yúuchul múul meyaj yéetel u mola’ayil Instituto para el Desarrollo de la Cultura Maya (Indemaya) beyxan Secretaría de Educación (Segey), le beetike’ béeychaj u ts’a’abal k’ajóoltbil táan u túunta’al jump’éel meyaj ti’al u ts’a’abal u xookil maaya ti’ najilo’ob xook de nivel básico, ti’ méek’tankaajo’ob tu’ux táan u bin u jáawal u t’a’anal maaya.

Jo’oljeake’, jala’ache’ tu beetaj u t’aanil ti’al u chúunsa’al u nu’ukbesajil “Ko’ox kanik maaya t’aan”. U xookil le je’ela’ yaan u ts’a’abal presencial beyxan virtual, abierta, xma’ bo’olil yéetel ti’al u táakpajal tuláakal máak. Meyaje’ noj ba’al, ts’o’oke’ ku chíikbesik noj meyaj ti’al u k’i’itbesa’al, u. kaláanta’al yéetel u ka’ kuxkíinsa’al maaya, beyxan u yóol wíinik yéetel miatsil.

Beyxan, jala’ache’ tu ts’áaj k’ajóoltbil yaan u k’ubéentik ti’ Indemaya ka u je’eb jump’éel curso ti’al u meyajnáalilo’ob u mola’ayilo’ob jala’ach, ti’al beyo’ u ka’anal t’aan ti’al u yutsil le kaajo’.

“Lela’ ma’ uláak’ nu’ukbesaji’, jump’éel ba’ax ku síijil tak puksi’ik’al yéetel ku ts’áakto’on u muuk’il kjets’ik kt’aan tuka’atéen ti’ u kaajilo’ob Yucatán. Beeta’ab ktukultike’, su’tsil u  t’a’anal maaya, ba’ale’ lelo’ ma’ jaaji’. Maayae’ kuxa’an ichilo’ob, ts’o’oke’ noj ba’al ti’al yucatanilo’ob”, tu ya’alaj jala’ach.

Meyaje’ k’a’ayta’ab tu auditorioil u mola’ayil Secretaría de Economía y Trabajo (SETY). Díaz Menae’ tu ya’alaj kex tumen yaan ya’abach baatsilo’ob láayli’ u t’aniko’ob maayae’, yaan táankelemo’ob ma’ tu kano’obi’. Le beetik ku kaxta’al u ka’ líik’sa’al tuka’atéen.

Te’el súutuko’ táakpaj María Chulim Campos, máax jo’olbesik u cursosil maya t’aan; Julián Bustillos Medina, máax tu chíikbesaj Diputación Permanente ti’ u Congresoil Estado; xdiputada Maribel Chuc Ayala, máax jo’olbeisk Comisión Permanente de Educación, Ciencia y Tecnología; Ermilo Barrera Novelo, máax jo’olbesik Secretaría de Economía y Trabajo; yéetel Lidia Noh Torres, u poolil Educación Indígena ich Segey.