Ts’o’ok u máan ka’ap’éel ja’ab úuchik u sa’atal u kuxtal xmol ts’íib, Ana Patricia Martínez Huchim, máax síij tu puksi’ik’al u noj kaajil Tizimín.
Le beetike’, máaxo’ob láayli’ u chíimpoltiko’obe’ tu tsikbaltajo’ob ti’ Internet jayp’éel ba’alob yóok’lal u meyaj ti’al u k’a’ajsa’al u k’ajla’ayil.
Te’e súutuko’ táakpaj maaya ts’íib, Elisa Chavarrea, x-xak’al xook Cristina Leirana, jts’íib Iván Borges, xka’ansaj Lizbeth Carrillo, yéetel jxo’ok jump’éel ts’íib tumen José Manuel Tec. Le meyajo’oba’ beeta’ab tumen u múuch’il Sayab Tuukul.
Ti’al u káajbale’ x-xak’al xook Cristina Leirana t’aan yóok’lal u meyaj; tu ya’alaje’ k’a’anan ba’ax tu beetaj tumen ku taal u na’atal beey “feminismo ku síijil ichil”, tumen Pati, je’el bix u ya’alal ka’ach ti’e’, tu molts’íibtaj tsikbalo’ob ku ya’alal ichil u baatsil ti’al u páajtal u ts’íib yóok’lalo’ob; ti’ tu ts’áaj ichil u tsikbalo’ob yéetel u k’aay tuukulo’ob.
Beyxan tu ch’a’achibtaj noj meyajo’ob je’el bix U k’a’ajsajil u ts’u’ noj k’áax yéetel U yóol xkaambal jaw xíiw.
Beey túuno’, tu súutukil u tsikbal Ivan Borgese’, tu ya’alaj noj ba’al ba’ax beeta’ab tumen xts’íib, tumen tu péeksaj u yóol ti’al u káajal u ts’íib tumen tu kanaj bix u ch’a’acihbtik ba’alob ku yantal chéen ti’ kaaj.
Ka’alikil Lizbeth Carrillo, máax táaka’an tu múuch’il Xkusamo‘ob -tu’ux láayli’ xan táakpaj Patricia Martínez- tu ya’alaje’, k’a’anan ba’alo’ob tu beetaj Martínez Huchim yóok’lal maaya t’aan tumen tu much’aj ya’abach ba’alob ku tsikbalta’al ich kaaj.
Tu ts’ooke’ tu xokaj jayp’éel ik’il t’aano’ob beeta’ab tumen xmolts’íib.
Edición: Ana Ordaz
