K'iintsil
Ap
02/09/2025 | Kabul, Afganistán
Afganoilo’obe’ tu xchukul páano’ob tu yáam le seten ba’alo’ob nikikbalo’obo’ ti’al u kaxtik u láak’o’ob jsa’at úuchik u tíitikubáaj lu’um ts’o’ok u kíinsik kex 812 máako’ob, yéetel u loobilt uláak’ maanal 2 mil 800 u túul tu lak’inil Afganistán, beey úuchik u ts’a’abal k’ajóoltbil le lunes máanika’ tumen talibánil jala’ach.
6.0 u muuk’il úuchik u titikubáaj lu’u, tu yáak’abil le domingo máanika’, ts’o’oke’ u’uypaj ti’ jejeláas kaajo’ob ti’ u kaajil Kunar, naats’ ti’ u kaajil Jalalabad, tu tséel Nangarhar, tu’ux k’aschaj ya’abach ba’al.
Las 11:47 áak’ab ka’aj tu tíitubáaj lu’um, ts’o’oke’ u chúumukile’ ti’ yanchaj tu kilométroil 27 tu lak’inil-xamanlak’inil u noj kaajil Jalalabad, a’alab tumen Servicio Geológico ti’ u noj lu’umil Estados Unidos. Ma’ seen taam úuchik u tíitkubáajo’, chéen 8 kms u taamil. U tíitkubáaj lu’um maas beey yóok’kabile’ maas ya’ab ba’al ku k’askúuntik. Tu paach noj tíitajile’, taal uláak’o’ob éets’tej.
Oochelo’ob jóok’sa’abe’ tu chíikbesaj áantaj máako’ob ka’alikil u jóok’sik máaxo’ob úuch loob ti’ob ti’ le kúuchilo’ob níikij. Biinsabo’ob ti’ helicópteros ka’alikil u páana’al uláak’ ba0alo’ob.
Zabihullah Mujahid, juntúul máax beetik u k’a’aytajil ichil u talibán jala’achil, tu ya’alaj ti’ k’a’aytajil tsikbal le lunes máanika’, ts’o’ok u chukik kex 812 kimen máak, yéetel kex 2 mil 800 máax ti’ úuch loob. U ya’abile’ ti’ u kaajil Kunar.
Kúuchilo’ob Afganistáne’ ma’ jach ka’analtako’obi’, u ya’abile’. beeta’an yéetel concreto beyxan ladrillo, ts’o’oke’ najo’ob ti’ mejen kaajo’obe’ beeta’an yéetel luuk’ beyxan che’. Ya’abe’ ma’ mu’uk’antaki’.
”Paalale’ ti’ yaan yáanal ba’ax níikij. Nukuch wíinike’ ti’ yano’ob yáanal le ba’axo’ob lúubij. K’a’abéet to’on áantaj”, tu ya’alaj juntúul kajnáal ma’ tu ya’alaj u k’aaba’i’.
Xak'alutskíinsa'an tumen: Sasil Sánchez Chan
