Librobuse’ yaan u xíimbaltik lajunp’éel u kaajilo’ob Quintana Roo

Librobuse’ ts’o’ok u kóojol tu lu’umil Quintana Roo yéetel yaan u xíimbaltik 10 u p’éel ti’ le 11 u méek’tankaajilo’ob le lu’umo’. K’uch tu k’iinil 9 ti’ septiembre yéetel yaan u ts’ook máan tu k’iinil 28, beey úuchik u k’a’ayta’al ti’ Encuentro Estatal de Clubes de Lectura.

Le nu’ukulo’, jump’éel librería móvil táant u ts’o’okol u xíimbalt Kaanpech, yéetel maanal 2 mil u p’éel áanalte’ob ku máansik yóok’olal ciencia, k’ajla’ay, u ti’al mejen paalal, clásicos, ichil uláak’o’ob. U tuukulil meyaje’, leti’ u k’ujsa’al áanalte’ob te’el mejen kaajo’obo’, tu’ux ma’ suuka’an u k’uchulo’obi’, le beetik ti’ librobus u máansa’alo’ob. Tak walkila’, waxakp’éel librobus le ku máan u xíimbalo’ob u kaajilo’ob México.

En español: Librobus recorrerá 10 municipios de Quintana Roo

“Yaan u p’áatal tak tu k’iinil 28 ti’ septiembre, yéetel óol tuláakal méek’tankaajo’ob ken u xíimbaltej. Yaan u k’uchul tu’ux mina’an bibliotecas, je’ex tu kaajil Carrillo Puerto, Tulum, yéetel ts’o’ok u xíimbaltik Solferino, Lázaro Cárdenas, beyxan yaan u máan Bacalar, Mahahual yéetel yaan xan u k’uchul capital, ti’al u k’uchul tak tu xuul kaajil yéetel Belice, ts’o’oke’ yaan xan u bin tu parqueil Andrés Quintana Roo…”, tu ya’alaj Lilian Villanueva, máax jo’olbesik Instituto de la Cultura y las Artes tu lu’umil Quintana Roo.

Je’el ba’axak miatsile’, yéetel xook ku káajal. Le beetik k’a’anan áanalte’ob. Librobuse’ ku máansik áanalte’ob ku tojoltik ichil 9 pesos tak 200.

Beey túuno’, máake’ ku béeytal u manik áanalte’ u k’áat ti’al u biinsik tu yotoch, le ken u yóotej… maas ka yanak wa ba’ax u mach paalal tu yotoch, a ke ka p’áatak chéen tu beel iPad wa telefóno, wa je’el ba’axak nu’ukul ma’ k-k’áat ka p’áatak tu k’abo’ob buul k’iin”, tu ya’alaj.

Bej tu’ux kun máan Librobuse’ yaan u ts’a’abal k’ajóoltbil tu redes socialesil Instituto de la Cultura y las Artes (@CulturadeQRoo).