Te’el ja’aba’, tu chukaj 115 u p’éel ja’ab je’ebek u joolnajilo’ob Parque Zoológico del Centenario. Le beetike’ u jo’olpóopil u noj kaajil Jo’e’, Cecilia Patrón Laviada tu ya’alaje’, le kúuchilo’ k’a’anan tumen ti’ ku múuch’ul baatsilo’obi’, ts’o’oke’ ya’abach máak lik’a’an te’elo’.
“Centenarioe’ jump’éel kúuchil tu’ux kaláanta’an k’áax yéetel tu’ux ku péektsilta’al u kuxtal ba’alche’ob yéetel che’ob te’el noj kaaja’, ts’o’oke’ kúuchil chíikbesik xan máaxo’oni’. Ku ye’esik bix lik’a’ano’on ich baatsil”.
En español: El Centenario cumple 115 años de historias atesoradas en el corazón de las familias meridanas
Ti’ k’iimbesaje’, kajnáalo’obe’ béeychaj u cha’antiko’ob circo, beyxan yucatánil cha’ano’ob, je’el bix xan u báanalil pelotas, yéetel u yisíinsa’al máak yéetel yo’om; beyxan koonol k’aaba’inta’ab Manos Verdes Mérida.
Te’el súutuko’, xota’ab xan ki’ waaj. “Máax ma’ na’akak te’el trenecitoo’, wa u ma’ u xíimbaltmaj mona Susy wa hipopótamos, ichil uláak’ ba’alo’ob, tumen leti’e’ ba’axo’ob chíikbesik Centenario, jump’éel kúuchil ts’o’ok 115 ja’abo’ob yanak, ts’o’oke’ ya’abach k’a’ajesajo’ob u beetmaj u yantal tu puksi’ik’al kajnáalo’ob”, tu ya’alaj Cecilia Patrón.
Parque Zoológico del Centenarioe’ ku je’ebel martes tak viernes, desde las 8 ja’atskab k’iin tak las 5 u taal u chíinil k’iin; beyxan je’ek’ab sábados yéetel domingos, 8 tak 6 u taal u yáak’abtal. Jejeláas kúuchilo’ob yaan ti’al u náaysik u yóol máak, je’ex kiosko, trenecito, u na’akal máak ti’ balsas, báaxalo’ob, u kúuchil janal, ichil uláak’ ba’alo’ob. Yaan xan jejeláas ba’alche’obi’, je’ex kéejo’ob, llamas, nukuch miiso’ob, yéetel ya’abach uláak’o’ob.
Xak'alutskíinsa'an tumen: Sasil Sánchez Chan
