Maanal 6 mil 471 u túul máako’ob tu pa’ataj u yéemel Kukulcán tu tséel pak’il El Castillo. Le domingo máanika’, tu much’ubáaj iik’, ja’ yéetel k’iin, jun súutuk ka’aj ch’éen u k’áaxal ja’e’, kex las 16:51 u taal u síistal k’iine’, u yoochel k’u’uk’ul kaane’ chíikpaj te’el tuunich múulo’.
Ich múul meyaj beeta’ab tumen Patronato de las Unidades de Servicios Culturales y Turísticos del Estado de Yucatán (Cultur), yéetel u meyajnáalilo’ob u yúuchben kaajil Chichen Itzáe’, tu kaláantaj ka béeyak u yokol tu beel tuláakal máaxo’ob k’uch te’elo’. Ojéelta’abe’ kóoj maanal 3 mil 32 máak keetel yéetel le ja’ab máaniko’.
En español: Chichén Itzá vive equinoccio de otoño con afluencia récord
Máax jo’olbesik Cultur, Clemente Escalante Alcocer, yéetel máax jo’olbesik Zona Arqueológica beyxan u kúuchil Gran Museo de Chichén Itzá, Guadalupe Espinosa Rodríguez, tu xíimbalto’ob parador te’el Zona Arqueológicao’, Gerónimo Can Tec, yéetel máax kaláantik kúuchil Gaspar Burgos Fuentes, béeychaj u cha’antiko’ob u kéet yantal k’iin yéetel turístico ka tu ya’alajo’obe’ jach uts úuchik u k’a’amal tumen u kajnáalilo’ob México, tumen jach k’ucho’ob tu súutukil ti’al u cha’antiko’ob le noj ba’al úucho’.
Tu jo’oloj p’ata’ak junsúutuk ti’al u k’ajsa’al kimen máako’ob ts’o’ok wáaj’ok u yantal ti’ le ts’ook k’iino’oba’, máax jo’olbesik Gran Museo de Chichén Itzá, Miguel Ángel Buenrostro Alba; máax beetik u subdirectoril Difusión áak’ab, tu’ux jach a’alabe’ u na’at úuchben maaya kaaje’, láayli’ u ki’ cha’anta’al tumen yóok’ol kaab. Kex tumen yanchaj u nookoyil yéetel cháake’, béeychaj u yila’al Kukulcán tak te’el lu’umo’: papaxk’a’abta’ab yéetel ki’iki’ óolta’ab.
Xak'alutskíinsa'an tumen: Sasil Sánchez Chan
