U ba’alche’ilo’ob yéetel wíinkilalo’ob ku síijil tu k’ab j-oaxacail boon Amador Montes, kóojo’ob Galerie Bourbon, ichil u noj e’esajil Fashion Week París, le 30 ti’ septiembrea.
Boono’obe’ tu yaajsaj u tuukul yucatánil xdiseñadora Mora Ruiz, ti’al u beetik jump’éel túumben colección, jts’a’ab u k’aaba’ beey Carmen, tu’ux táabkesa’an u p’éel vestidos. meyajta’ab tu talleresil yaan tu kaajil Jo’. Le je’ela’ jump’éel meyaj núup ichil Ruiz, tumen ku jeel ts’íibtik u yóol u k’aay tuukul Montes. Chuuye’ tu beetaj yóok’ol lino yéetel seda, ts’o’okole’ ku kaxtik u chíimpoltik maaya, yucatánil yéetel libanesil ko’olel, beyxan ku much’ik ya’abach ja’abo’ob ti’ u k’ajla’ayil le lu’uma.
En español: Yucatán y Oaxaca viajan a Francia para representar a México en el Fashion Week Paris
Beey túuno’, Oaxaca yéetel Yucatáne’ ku múul xíimbalo’ob ti’al u k’uchulo’ob París, tu’ux kéen u chíikbeso’ob México ti’ jump’éel u asab k’a’anan e’esajil moda yaan ichil tuláakal yóok’ol kaab.
U meyaj Amador Montese’ ku jupik máak ti’ ba’ax jach jats’uts u yila’al, tu’ux u wíinkilal máake’ ku jit’kubáaj yéetel ba’alche’ob; u chíikulal ko’olel yéetel ch’íich’e’ ma’ chéen ku ye’esik wíinik yéetel ba’alche’i’, ku ye’esiko’ob xan ba’ax yana yéetel ba’ax mina’an.
Ma’ yáax juntéen u táakpajal Montes ti’ modai’. U bonmaj uláak’ ba’alo’ob ti’al pasarelas. U serieil “La pintura hecha mujer” patjo’olta’ab ti’al jump’éel e’esajil yanchaj Oaxaca. Ba’ale’ yáax juntéen kéen e’esa’ak boono’ob ti’ uláak’ táanxel lu’umil, úuchik u múul meyaj yéetel Mora Ruiz.
Ti’al le múul meyaja’, yéeya’ab jayp’éel u meyaj Montes, le maas jach taak’al u yokol ichil le proyectoo’. Ti’ túun jch’a’ab Gemelas, Aves de paz yéetel Carmen, u ts’ooka’ leti’e’ boon asab k’a’anano’ tumen leti’ ts’áak u k’aaba’ le múuch’ boono’obo’. Le múuch’o’ yaan u ye’esa’al tu kaajil París, ts’o’oke’ kéen su’utuk Méxicoi’ ma’ ya’ab kun beetbil ti’al konbili.
Xak'alutskíinsa'an tumen: Sasil Sánchez Chan
