Tahlequah, juntúul oorka jach k’ajóolta’ab yóok’ol kaab tumen walkil ka’ap’éel ja’ab paachile’, yanchaj juntúul u chan mejenile’ chéen ba’ale’ kíimij, ts’o’okole’ máan yéetel 17 k’iino’ob kex beey kimeno’; náachchaj maanal ti’ mil 600 kilómetros. Walkila’ oorkae’ yo’omchaja’an tuka’atéen, beey a’alab tumen ajxak’al xooko’ob.
John Durban, juntúul u aj xak’al xookil Southall Environmental Associates, yéetel Holly Fearnbach, máax jo’olbesik u xak’al xookil mamíferos kuxa’ano’ob ti’ k’áak’nab xma’ koonolil SR#, tu ts’o’oksajo’ob jump’éel noj meyaj ti’al u jach kaxtiko’ob tu beel, yéetel u yáantajil droono’ob, jach tu’ux ku máan le ba’alche’oba’, tumen sajbe’entsil yanik u sa’atalo’ob, ts’o’okole’ tu yilajo’ob yaan jaytúul u xch’uupul ba’alche’ilo’ob yo’omchajano’ob ti’ u múuch’il J, K yéetel L, beey jts’a’ab k’ajóoltbil ti’ u pik’il ju’unil The Seattle Times.
Ma’ jump’éel ba’al jela’an u yo’omchajalo’oni’, ba’ale’ k’a’anan ba’ax táan u yúuchul yéetel Tahlequah yóok’lal ba’ax úuch yéetel u mejenil, tumen ma’ tu séeb p’áataji’.
