K'iintsil
Efe
13/10/2025 | Jerusalén, Israel
Le domingo máanika’ Israele’ tu k’a’aytaj leti’ bin náajalnaj ti’ ba’ateltáambal tu táan Hamás, ma’ili’ cha’abak máaxo’ob k’ala’antak, tukulta’an u beeta’al le lunes máanika’, tu jo’oloj ka’ap’éel ja’abo’ob ma’achako’ob Gaza, jump’éel ba’al jach k’a’anan ti’al tuukul meyaj táan u péektsiltik Donald Trump.
U jala’achil Estados Unidose’ yaan u xíimbaltik Israel le lunes je’ela’, ts’o’okole’ yaan u múul jo’olbesik yéetel egiptoil jala’ach Abdel Fatah al Sisi, u noj múuch’tambalil yóok’olal jets’óolal, tu noj lu’umil Gaza, tu kúuchil Sharm el Sheij, tu lu’umil Egipto.
Mokt’aan ch’a’aban ti’al u yantal jets’óolal ichil Israel yéetel Hamáse’, káaj u chíimpolta’al le viernes máanika’, ts’o’okole’ tukulta’an u béeytal u k’e’exel u ts’ook israeilo’ob láayli’ p’aatalo’ob Gaza -20e’ láayli’ kuxa’antak yéetel 28 kimeno’obi’- tu jeel óoli’ 2 mil palestinoilo’ob k’ala’anta’ak ti’ israelil carcelo’ob, ichil le je’elo’obo’ 250 máako’ob k’ala’an yóok’olal “seguridad nacional”.
Máaxo’ob k’extáantik le ba’alo’oba’ láayli’ táan u ts’o’ok beetik u t’aanil ti’al u béeytal, ts’o’oke’ a’alab xane’ islamistailo’obe’ láayli’ u k’áat u táakbes uktúul k’a’anan palestinoil dirigentes k’ala’an Israel ichil le k’eexil je’elo’.
Yáax ministro israelil, Benjamin Netanyahu, tu ya’alaj le domingo máanika’, ti’ tse’ek tu beetaje’, u lu’umil bine’ tu béeykunsaj “k’a’anan ba’alo’ob” ti’ ba’ateltáambal tu táan Hamás, tu lu’umil Gaza, ba’ale’ kex beyo’ tu ya’alaj “ma’ ts’oka’an ba’ateli’”.
Netanyahue’ t’aanaj jump’íit antes u yila’al u suut máaxo’ob k’ala’antak Gaza desde u k’iinil 7 ti’ octubre ti’ u ja’abil 2023, k’iin káaj ba’ateltáambal.
Xak'alutskíinsa'an tumen: Sasil Sánchez Chan
