Ichil meyajo’ob ku beeta’al ti’al u péektsilta’al ich kaaj u k’a’ananil u kaláantik máak ma’ u ts’a’ayal u ts’unu’usil iim, wa cáncer de mama, u jala’achil u lu’umil Yucatán, táan u táakmuk’tik jejeláas meyajo’ob te’el winala’. Ichilo’obe’ ti’ yaan promociones tu kúuchil Cines Siglo XXI yéetel uláak’ meyajo’ob tukulta’an ti’al u péektsilta’al u kaláantik máak u toj óolal.
U mola’ayil Patronato de las Unidades de Servicios Culturales y Turísticos del Estado de Yucatán (Cultur), ikil táan u meyajtik Agenda Rosa jo’olbesa’an tumen Sistema para el Desarrollo Integral de la Familia en Yucatán (DIF Yucatán), yaan u ye’esik jump’éel noj kaambalil activación física, le 22 ti’ octubre ku taala’, las 10 ja’atskab k’iin, tu kúuchil Centro de Convenciones y Exposiciones Yucatán Siglo XXI. U táakpajal máake’ xma’ bo’olil yéetel chéen ku k’áata’al ti’ máak ka u búukint u nook’ rosado yéetel xanab de cómodo.
Beyxan úuchik u yantal múul meyaj yéetel DIF Yucatáne’, j-e’esa’ab tu kúuchil Cines Siglo XXI u documentalil Las amazonas, tu’ux ku chíikbesa’al bix u kaxtik u jóok’ol ch’a’ajoltik u kuxtal ko’olel, kex yaan k’iino’ob mix chíika’an ba’ax ku beetiki’, tu jo’oloj u píitjo’oltik u ts’unusil iim, tumen ku péek ti’al u k’ajóoltikubáaj tuka’atéen.
En español: Con documental y activaciones físicas en Yucatán, Cultur se une al mes contra el cáncer de mama
Cha’an beeta’an tumen Maria Bello Buenfil, jts’a’ab k’ajóoltbil tu ja’abil 2023; ku páayt’antik wíinik ti’al u tukultik ba’axo’ob ku máansik ko’olel tu yóol yéetel tu wíinkilal kéen yanak u ba’atel tu táan le k’aak’as k’oja’anila’.
Ti’al túun u páayt’anta’al máak ti’al u kaláantikubáaje’, Cines Siglo XXIe’ yaan u beetik promoción tu dulceríail, le 19 ti’ octubre ku taala’, tumen u U K’iinil u kaláantikubáaj máak ti’ u ts’unu’usil iim, wa cáncer de mama, ti’al máaxo’ob kun bin yéetel u nook’ de rosado.
Beyxan, Patronato Culture’, ikil u kaxtik xan u ts’aatáantik máak u séeb ilik wa ku tsa’ayal ti’ le k’oja’anila’, Patronato Culture’ yaan u ts’áak u boonil paradores turistícos, ti’al u péektsiltik u k’a’ananil u láak’inta’al máaxo’ob ku máansiko’ob talam k’iino’ob yéetel le k’oja’anilo’.
Ichil xookil beeta’an tumen Instituto Nacional de Estadística y Geografía (Inegi), tu lu’umil Méxicoe’, k’aak’as k’oja’ano’ob ku tsa’ayal ti’ ko’olel -je’ex u ts’unu’usil iime’- tu chíikbeso’on u yóoxp’éel k’oja’anil kíinsik ko’olel tu ja’abil 2023. Desde u ja’abil 1988e’, octubree’ káaj u chíimpolta’al beey Mes de Sensibilización sobre el Cáncer de Mama, ti’al u péektsilta’al ka u xak’alt máak u wíinkilal mantats’ tumen beyo’ je’el u yila’al wa táan u tsa’ayal, yéetel wa najmal u ts’aatáanta’al u kuxtal máak.
Xak'alutskíinsa'an tumen: Sasil Sánchez Chan
