K'iintsil
La Jornada
27/10/2025 | Ciudad de México
Lando Norris tu p’ataj paachil McLaren, Oscar Piastri, ichil máaxo’ob táaka’an te’el keetilo’. Leti’ p’áat tu jach ka’analil Gran Premio ti’ u noj kaajil Ciudad de México.
Norrise’ táanilchaj 30.3 segundos ti’ Charles Leclerc (Ferrari), ts’o’oke’ Max Verstappene’ (Red Bull) ma’ jach k’aas úuchik u k’alik le ts’ook k’iino’oba’ tumen béeychaj u p’áatal tu yóox kúuchil ketlam. Beyo’, ma’ jach náak p’áatik ka’alikil chéen kamp’éel fechas p’aatal ti’al u ts’ookol le temporada je’ela’.
Jump’éel vuelta antes u ts’o’okol keetile’, ila’abe’ je’el u máasa’al Leclerc tumen Vertappen, jump’éel virtual safety care’ tu beetaj u láaj éensik máak u chichil u bin, ka jp’áatako’ob jach je’ex yaniko’obo’, le beetike’ ma’ k’éex mix ba’al yóok’olal máaxo’ob béeychaj u na’akalo’ob podioi’.
Chan talamchaj ba’al ti’ neerlandesil Red Bull máak tumen táats’ jóok’ik yéetel u llantasil, ts’o’oke’ tu k’exaj a medios. Kúulpach ti’ ba’ax k’a’abéetkunsa’ab tumen Norris yéetel Leclerc, ts’o’oke’ kex beyo’, tu p’ataj paachil le quinto kúuchil tu’ux yaan ka’ach ka’aj káajo’.
Piloto Oliver Bearmane’, ti’ u múuch’il Haase’, chíikpaj te’el k’iino’ tumen tu kan kúuchil ts’o’okij, ts’o’oke’ jach keetel u bin yéetel Verstappen.
Walkil túuna’, 357 puntos yaan ti’ Norris. Chéen jump’éel maanal yóok’ol Piastri.
Verstappene’ láayli’ táan u náats’al, ma’ jach paachil p’áatiki’, úuchik u k’uchul yéetel 321.
Xak'alutskíinsa'an tumen: Sasil Sánchez Chan
