Andrea Herrera Lópeze’, káaj u patjo’oltik jejeláas balts’amo’ob tu ja’abil 1976, ts’o’okole’ ma’ je’elek tak walkila’.
Le beetik, tuláakal ba’ax ts’o’ok u meyajtike’, yaan u chíimpolta’al yéetel u jach k’a’anan chíikulal ku k’u’ubul ti’ máaxo’ob beetik balts’am tu lu’umil Yucatán: medalla Héctor Herrera Cholo. Leti’e’ ku k’ub óoltik ti’ u yuum, beyxan ti’ uláak’ u yéet meyajo’ob yéetel ti’ máaxo’ob cha’antik u meyaj.
Ts’o’ok u náachtal u xíimbal ti’ ba’ax ku beetik. Káaj u máan chéen ti’ k’iimbesajo’ob; tak ka’aj káaj tu ch’a’aj u muuk’ yéetel yanchaj u yóol tuláakal ba’al u patjo’olmaj; jujump’íitil úuchik u bin u jats’utstal u yila’al ich kaaj.
U meyajil balts’am formaale’, káaj tu chúumukil u ja’abilo’ob 70, yéetel u láak’inajil u yuum, Wilberth Herrera. Kex chan paale’, ti’ ku meyaj tu k’iimbesaj kúuchil ku k’aaba’tik Maravilla, ti’alinta’an tumen yuum Wilberth, ts’o’okole’ te’e k’inako’obe’, jach chéen te’e kúuchil je’elo’ ku páajtal u cha’antal tiiterées ti’ jump’éel k’iimbesaj. Walkila’, ts’o’ok maanal 30 ja’abo’ob káajak u meyaj xbeet balts’am yéetel tiiterées; ya’abach u péersonajesil u patjo’olmaj, ts’o’okole’ jach ki’imak u yóol tumen ma’alob úuchik u k’a’amal ti’al cha’antbil.
Edición: Ana Ordaz
