K'iintsil
Afp
13/11/2025 | Belém, Brasil
Ya’abach máasewal máako’obe’ tu yaktáanto’ob le martes máanika’, máaxo’ob kaláantik u noj múuch’tambalil Conferencia de las Naciones Unidas yóok’olal Cambio Climático (COP30) tu noj lu’umil Belém, tumen tu ts’áajubajo’ob okol ichil kúuchil tu’ux táan u beeta’al le noj meyajo’. Lelo’ ma’ jump’éel ba’al suuk u yila’ali’ ichil múuch’tambal ku beeta’al tumen u mola’ayil Organización de las Naciones Unidas (ONU), beey úuchik u ya’alik u ajts’íib péektsilo’ob Afp.
Máasewal wíiniko’obe’ tu líik’saj u t’aano’ob yéetel óok’ot tu táan kúuchil antes u yokolo’obi’, ba’ale’ máaxo’ob ku kalano’ob te’elo’ tu t’úulchintajo’ob ti’al u jóok’olo’ob. Ajkanan kaajo’obe’ tu ts’áajo’ob sillas yéetel mesas te’el joolnajo’ ti’al ma’ u béeytal u ka’ okolo’obi’. Juntúul u jts’íib péektsil Afp tu yilaj táan u jóok’sa’al juntúul jkanan kaaj yóok’ol silla de ruedas.
U kaláanta’al ichil kúuchil tu’ux táan u beeta’al COP30e’ k’ubéenta’an ti’ ONU; le táankabilo’, p’ata’an tu k’ab u mola’ayilo’ob kanan Brasil. María Clarae’, juntúul ti’ máaxo’ob tu líik’saj u t’aane’, ku meyaj ichil u múuch’kabil Rede Sustentabilidade de Bahía, tu tsolaj líik’saj t’aane’ beeta’abe’ táan u kaxtik ka’ach u chíikbesik bix yanik “máasewal kaajo’ob”. Ba’ale’ “t’aano’obe’ ma’ táan u yu’ubali’”, tu ya’alaj.
COP30e’, múuch’tambal yóok’olal cambio climático, táan u beeta’al ti’ amazónicail kaaj, tu xamanil Brasil. Káaj le 10 ti’ noviembre máaniko’, yéetel tukulta’an u ts’o’okol tu k’iinil 21 ku taala’.
Xak'alutskíinsa'an tumen: Sasil Sánchez Chan
