Rosalíae’ tu ya’alaj: “Beetchajak Lux”. Xk’aay jach k’ajóolta’an tumen tu kanaj bix u xa’ak’tik u paaxil famenco yéetel u k’aayil hip hop latino, urbano, beyxan reguetón, tu ts’áaj k’áajóoltbil noj k’eex yanchaj tu meyaj.
Túumben k’aayo’ob tu beetaje’ múuch’ ti’ Luz (ich latin t’aan), ts’o’oke’ ku chíikbesik bix u yóol. Jo’ lajun k’aayo’ob táakbesa’ani’, ts’o’oke’ ku yu’uba’al óoxlajunt’aano’ob, tu’ux táakbesa’an u ja’ajatsil latín, árabe yéetel hebreo.
Xabier Gómez García, u obispoil Sant Feliu de Llobregat, kaaj méek’majil u kaajal Rosalía, Sant Esteve Sesrovires, naats’ Barcelonae’, tu ki’imak óoltaj u meyaj xk’aay, úuchik u beetik jump’éel ts’íib ti’al u máaxo’ob u’uyik Iglesiai’. U chiich Rosalíae’ mantats’ u bin u yu’ub misa Sant Esteve Sesrovires.
Ti’ tsikbal tu beetaj yéetel AP, Gómeze’ tu ya’alaj kex tumen “provocativas” jayp’éel k’aayo’obe’, “jáalk’ab u t’aan Rosalía, ts’o’oke’ mixba’al ku balik ti’ ba’ax ku na’atik yóok’olal Dios, ts’íibóolal yéetel u yuk’ajil u yóol máak”.
“Ka’aj tin wu’uyaj u meyajil Lux, yéetel tsikbal beeta’ab yéetel Rosalía tu’ux ku ya’alik bix úuchik u tukultik meyaj, beyxan bix tu patjo’oltaj k’aayo’obe’, káaj in na’atike’ ma’ chéen k’aayi’, tumen yaan u yóol u kaxt u t’aan ko’olel mu’uk’a’an u yóol”.
Yáax k’aayo’obe’ ku múul u’uya’al yéetel u paaxil piano beyxan violonchelo: “máax bíin kuxlak ichil ka’atúulo’on / yáax u yaabilta’al yóok’ol kaab, ts’o’oke’ u yaabilta’al Yuum K’uj”, Rosalíae’ ku ya’alik le meyaj je’ela’, ku náachtal ti’ le un yáax beetmajo’obo.
U jejeláasil estilos, beyxan k’aayo’obe’, ku ye’esik cuerdas clásicas, u xóoxot’aj electrónica -tu’ux ku táakpajal Björk-, junmúuch’ k’aay paalal ti’ jump’éel úuchben monasterio, jump’éel u k’aayil aria ich italiano, jump’éel fado ich portugués yéetel flamenco ku yu’uba’al te’el k’iino’oba’, beyxan u ritmosil hip hop. Luxe’ mu’uk’a’an u bin u pe’echa’ak’, tumen kamp’éel ti’ le k’aayo’obo’, táaka’an ichil u tsoolil 50 global tu kúuchil Spotify, te’el semana, ts’o’oke’ lelo’ ku píitmansik uláak’ xk’aayo’ob, je’el bix Taylor Swift.
Xak'alutskíinsa'an tumen: Sasil Sánchez Chan
